50 dan ortiq kishi bedarak yo‘qolgan deb hisoblanmoqda; politsiya yong‘in sabablarini aniqlash bo‘yicha tergov olib bormoqda.
Pokiston rasmiylariga ko‘ra, o‘tgan dam olish kunlari Karachi shahridagi savdo markazida yuz bergan yong‘in oqibatida halok bo‘lganlar soni kamida 14 kishiga yetdi. Hozirda 50 dan ortiq bedarak yo‘qolganlarni qidirish ishlari davom etmoqda.
Dushanba kuni politsiya bosh inspektori o‘rinbosari Sayid Asad Razo «Dawn» gazetasiga bergan ma’lumotiga ko‘ra, yakshanba oqshomidan beri qutqaruvchilar yana sakkizta jasadni topishgan va buning natijasida qurbonlar soni 6 nafardan 14 nafarga ko‘paygan.
Politsiya va qutqaruv guruhlari bedarak yo‘qolgan 54 tadan 59 tagacha bo‘lgan odamni qidirishda mobil telefon ma’lumotlaridan foydalanmoqda va tafsilotlarni yig‘ish uchun ularning oilalari bilan bog‘lanmoqda.
«Milliy fojia»
Dushanba kuni voqea joyiga tashrif buyurgan Sind viloyati gubernatori Kamran Tessori mahalliy OAVga 70 dan ortiq kishi bedarak yo‘qolganini ma’lum qildi. «70 dan ortiq kishining bedarak yo‘qolgani haqidagi xabarlar o‘ta tashvishli va bu katta ofatdir. Ushbu hodisa endi milliy fojiaga aylandi», — dedi gubernator.
Yong‘in shanba kuni kechqurun zich joylashgan «Gul Plaza» savdo majmuasida boshlangan. O‘t o‘chiruvchilar ulkan yong‘inni taxminan 36 soatdan keyin nazorat ostiga olishga muvaffaq bo‘lishdi, shundan so‘ng qutqaruv guruhlari ichkarida qolib ketganlarni qidirish uchun binoga kirishdi.
Biroq, rasmiylar bino hozirda o‘ta beqaror holatda ekanligi va istalgan daqiqada qulab tushishi mumkinligidan ogohlantirmoqda. Dushanba kuni tushdan keyin savdo markazining bir qismida yana alanga ko‘ringani sababli o‘t o‘chirish ishlari qaytadan boshlangan.
Sabablar va e’tirozlar
Dastlab rasmiylar yong‘inga do‘konlardan biridagi elektr simlarining qisqa tutashuvi sabab bo‘lgan deb taxmin qilishgan edi, biroq hozirda aniq sabab noma’lumligicha qolmoqda va politsiya tergov o‘tkazmoqda.
Tadbirkorlar va mahalliy aholi OAVga bergan intervyusida yong‘inga qarshi kurash choralari kechikkani, suv va maxsus uskunalar yetishmaganini aytishdi. Bu esa o‘n yillik mehnatlari natijasi bo‘lgan mulklaridan ayrilgan savdogarlarning g‘azabiga sabab bo‘ldi.
Karachi shahrida xavfsizlik standartlariga rioya qilmaslik va noqonuniy qurilishlar tufayli tez-tez halokatli yong‘inlar yuz berib turadi:
-
2023-yil noyabr: Savdo markazidagi yong‘inda 10 kishi halok bo‘lgan.
-
2012-yil: Tikuvchilik fabrikasidagi dahshatli yong‘inda 260 kishi qurbon bo‘lgan edi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
