«Xorijiy tillarni oʻrganishni ommalashtirishni samarali tashkil etish chora-tadbirlari toʻgʻrisida»gi Hukumat qarori (312-son, 19.05.2021 y.) qabul qilindi.

Qarorga koʻra, Oʻzbekiston davlat jahon tillari universiteti huzuridagi Chet tillarini oʻqitishning innovatsiyaviy metodikalarini rivojlantirish respublika ilmiy-amaliy markazi faoliyati tugatildi.

Xorijiy tillarni oʻrganishni ommalashtirish agentligi huzurida taʼlim tashkilotlarining xorijiy tillar pedagoglarining malakasini oshirish boʻyicha mobil guruhlar tashkil etiladi.

Mobil guruhlar, eng avvalo, olis hududlarda joylashgan yoki xorijiy tillarni oʻqitish boʻyicha koʻrsatkichi past boʻlgan taʼlim tashkilotlari oʻqituvchilarining malakasini oshirishga jalb etiladi.

Qarorga muvofiq, negizida xorijiy tillarni oʻqitishga ixtisoslashtirilgan maktablar tashkil etiladigan umumiy oʻrta taʼlim muassasalari (207 ta) hamda ularga biriktirilayotgan oliy taʼlim muassasalari roʻyxati tasdiqlandi.

Xorijiy tillar boʻyicha oʻtkaziladigan respublika olimpiadalarida ishtirokchilarning 4 ta koʻnikmasini (tinglab tushunish, oʻqish, yozish va gapirish) baholash tartibi joriy etiladi.

2022/2023 oʻquv yilidan tanlangan umumtaʼlim maktablari 4-sinf bitiruvchilari, 2024/2025 oʻquv yilidan esa 9-sinf bitiruvchilarining xorijiy tillarni bilish darajasini aniqlash boʻyicha maxsus sinov oʻtkazish amaliyoti yoʻlga qoʻyiladi.

Shuningdek, har bir tuman (shahar)da ochiq tanlov oʻtkazilib, Qoraqalpogʻiston Respublikasi, viloyatlar va Toshkent shahridan kamida 2 nafar ingliz tili oʻqituvchilari va bir nafar boshqa xorijiy til oʻqituvchisi xorijiy davlatlarga qisqa muddatli malaka oshirishga yuboriladi.

2021 yil yakunigacha OTMlarda davlat-xususiy sheriklik asosida oʻqituvchi va talabalarga xorijiy tillarni oʻqitish markazlari (kurslari) tashkil etiladi.

24 soat davomida xorijiy tillarda efirga uzatiladigan tele va radiokanallar ishga tushiriladi. Bunda har kuni kamida 3 soatlik dastur xorijiy tillarni onlayn oʻrgatishga ajratiladi

t.me/huquqiyaxborot

 83 

Fikr bildirish

Email manzilingiz chop etilmaydi. Majburiy bandlar * bilan belgilangan