Farzandni moddiy jihatdan taʼminlash otaning burchi hisoblanadi. Oilaviy ajrimlardan soʻng, er va xotinning oʻzaro kelishmovchiligidan koʻproq bolalar aziyat chekadi.

Ona hech qayerda ishlamasa, qoʻlida hunari boʻlmasa yoki daromad manbai boʻlmasa, bolalar moddiy jihatdan ham tang ahvolda qoladi. Sud qarori asosida farzandlari uchun aliment undiradigan oilalarda, oʻz vaqtida toʻlanmagan bu pullar tufayli anchagina moddiy qiyinchiliklar yuzaga keladi. Majburiy ijro byurosi Qashqadaryo viloyat boshqarmasi organlari tomonidan farzandlari uchun aliment pullarini oʻz vaqtida toʻlamay kelayotgan otalarga tushuntirish, ogohlantirish va soʻngida ularga nisbatan qonuniy chora koʻrish ishlari amalga oshiriladi.

Shahrisabz shahrida ana shunday masʼuliyatsiz otalarning 8 nafariga 15 sutkalik maʼmuriy qamoq jazo chorasi qoʻllanildi. Jumladan, fuqarolik ishlari boʻyicha Shahrisabz tumanlararo sudining qaroriga asosan fuqaro M.Kamolovdan bir nafar farzandining moddiy taʼminoti uchun aliment undirish belgilangan. Otaning aliment pullarini kam miqdorda va kechiktirib toʻlaganligi oqibatida, anchagina qarzdorlik yigʻilib qolgan.

Davlat ijrochisining aliment qarzini qayta hisoblash qaroriga koʻra 67 oy uchun toʻlanmagan 41 mln. 688 ming soʻm pullar fuqaroga nisbatan qonuniy chora koʻrishga asos boʻldi. Shuningdek, fuqaro S.Eshboyev ham bir nafar farzandining moddiy taʼminoti uchun 17 mln. soʻm miqdoridagi aliment pullarini qasddan toʻlamay kelganligi oqibatida maʼmuriy javobgarlikka tortildi.

Kelgusida ushbu aliment pullari belgilangan muddatda toʻlab berilmagan taqdirda, qarzdorlarni jinoiy javobgarlikka tortishga asos boʻladi.

 33 

Fikr bildirish

Email manzilingiz chop etilmaydi. Majburiy bandlar * bilan belgilangan