Журналист ва шоир Акмал Тошев 37 ёшида вафот этди

Журналист ва шоир Акмал Тошев вафот этди. Бош прокуратура ҳолат бўйича текширув ўтказилганини маълум қилди.

Қайд этилишича, шу йилнинг 8 март куни 37 ёшли журналист Акмал Тошев вафот этганлиги юзасидан Бектемир тумани прокуратураси томонидан терговга қадар текширув ҳаракатлари ўтказилмокда.

Суд-тиббиёт экспертизасининг дастлабки хулосасига кўра, А.Тошевнинг ўлими «Юрак тампонадаси, ўпка артерияси аневризмасининг ёрилиши, юрак туғма нуқсони, юрак бўлмачалари дефекти»дан келиб чиққан.

Маълумот ўрнида, шоир ва журналист Акмал Тошев 1985 йил 6 апрелда Қашқадарё вилояти Деҳқонобод тумани Оқтош қишлоғида туғилган. 1992-2003-йиллар қишлоқдаги 41 умумтаълим мактабида ўқиган. Мирзо Улуғбек номидаги Ўзбекистон Миллий университетида журналистика факултетида бакалавр йўнилишини (2004-2008), магистратура босқичида (2011-2013) таҳсил олган. “Ишонч” ва “Ишонч-Доверие” газеталари таҳририятида бўлим муҳаррири лавозимида ишлаган.

А.Тошевнинг қатор марказий газета ва журналларда шеърлари чоп этилган. “Моҳият лаҳзалари” (2008), “Фариштали кунлар” (2011) номли шеърий тўпламлари нашр этилган.