Гавайи губернатори Жош Грин Мауи оролидаги вайронкор ўрмон ёнғинлари оқибатида 1000 дан ортиқ одам бедарак йўқолганлигини маълум қилди. Қидирув-қутқарув ишлари давом этмоқда, деб хабар бермоқда The Hill.
Губернаторнинг сўзларига кўра, 1050 га яқин одам бедарак йўқолган. Жабрланганларни қидириш яна бир неча ҳафта давом этади.
Унинг қўшимча қилишича, қидирув-қутқарув гуруҳининг юзлаб аъзолари ва 41 та ит қидирув ишларига жалб этилган.
Ўрмон ёнғинлари содир бўлган ҳудудларнинг 85 фоизи аллақачон ўрганилган.
Мауини қамраб олган ўрмон ёнғинлари АҚШнинг замонавий тарихидаги энг ҳалокатли ёнғинга айланди.
Расмийларнинг ҳисоб-китобларига кўра, камида 114 киши ҳалок бўлган, деб хабар беради NBC News.
Илгари бедарак йўқолган деб топилганлар сони 2000 дан ортиқ бўлган бўлса, уяли алоқа қайта тиклангани ва яқинлари билан алоқа ўрнатиш имконига эга бўлгач, бу рақам камайди.
Қайд этилишича, бундай даҳшатли ўрмон ёнғинлари қурбонлари сонини аниқ санаш ва уларнинг шахсини аниқлаш учун ойлар ва ҳатто йиллар керак бўлиши мумкин.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
