“Tashabbusli byudjet”ning ushbu mavsumida fuqarolar tomonidan 27 mingdan ortiq loyiha ilgari surilgan

✅ Ilgari surilgan loyihalarning 23 mingdan ortiq qismi ishchi guruhlar tomonidan belgilangan mezonlarga muvofiq tanlab olinib, ovoz berish jarayonlariga o‘tkazildi.

✅ Shuningdek, mazkur jarayonlarga g‘olib loyihalarni moliyalashtirish uchun 2 trln so‘mdan ortiq mablag‘ yo‘naltirilishi kutilmoqda.

✅ Joriy mavsumning avvalgi mavsumlardan farqli tarafi shundaki, endilikda “Tashabbusli byudjet” jarayonlari 4 bosqichda o‘tkaziladi.
Bunda:

⏺6-26 iyul — taklif kiritish bosqichi;

⏺26 iyuldan 15 avgustga qadar — moderasiya bosqichi;

⏺15–22 avgust — saralashdan o‘tgan loyihalar bo‘yicha targ‘ibot bosqichi;

⏺22 avgustdan 1 sentyabrga qadar — saralashdan o‘tgan loyihalarga ovoz berish bosqichi o‘tkazilishi rejalashtirilgan.

⚡️ Ta’kidlanishicha, Tashabbusli byudjet jarayonini o‘tkazish bo‘yicha amaldagi tartibga bir qator o‘zgartirish va qo‘shimchalar kiritildi:

🔅 barcha mahallalar uchun g‘olib bo‘lish imkoniyatini yaratish maqsadida endilikda “Tashabbusli byudjet” doirasida so‘nggi mavsumlarda ketma-ket ikki marotaba g‘olib deb topilgan mahalla (tashkilot)lar uchun navbatdagi ikkita mavsum doirasida tanaffus e’lon qilinadi (ya’ni ushbu mahallalar uchun loyiha kiritish imkoniyati cheklanadi);

Ushbu tartib, ya’ni tanaffus qo‘llash amaliyoti 2025 yil 2-mavsumdan boshlab qo‘llanadi.

🔅 Kambag‘allikni qisqartirish va bandlik vazirligi tomonidan ovoz berish jarayonlarida byudjet tashkilotlari xodimlarini majburiy ovoz berishga jalb etish holatlarini qayd etish bo‘yicha “qaynoq liniya” ishga tushiriladi;

🔅Ovoz berish bosqichi yakunlanib, “Ochiq byudjet” portali tomonidan g‘olib loyihalar aniqlanganidan so‘ng Xalq deputatlari tuman (shahar) kengashlari mahalliy byudjetning qo‘shimcha mablag‘lari hisobidan keyingi o‘rinlardagi – g‘olib bo‘lmagan loyihalarni qo‘shimcha tarzda g‘olib deb e’lon qilish vakolati berildi;

🔅Har bir g‘olib loyihalar ijrosi ishchi komissiya tomonidan har oy joyiga chiqqan holda o‘rganib, buning natijalari yuzasidan fotomateriallarni “Ochiq byudjet” portalining “Sayyor-monitoring” bo‘limida aks ettirib boriladi;

🔅 Bunda, loyiha bo‘yicha ishlar to‘liq yakunlangandan so‘ng tashabbuskor fuqarolar, mahalla raisi va faollarining ish sifati yuzasidan roziligi olinganidan keyingina foydalanishga topshirilishi belgilandi.