OTMlarda to‘lov-kontraktlarni amalga oshirish muddati 1-dekabrgacha uzaytirildi

Ikkinchi va undan yuqori bosqich talabalar kontraktini toʻlash muddati OTM rahbari tomonidan amaldagi tartib boʻyicha uzaytirilishi mumkin.

Davlat komissiyasining tegishli bayoni bilan 2024/2025-oʻquv yilida oliy taʼlim muassasalarining quyidagi bakalavriat hamda magistratura talabalari uchun toʻlovlarni amalga oshirish va talabalar safiga qabul qilishni rasmiylashtirishning muddati 2024-yil 1-dekabrga qadar (shu kuni ham) uzaytirildi:

⁃ bazaviy yoki tabaqalashtirilgan toʻlov-kontrakt asosida oʻqish istagini bildirgan abituriyentlar (1-bosqich);

⁃ PF–213-son (31.08.2022 y.) Farmoni asosida qoraqalpogʻistonlik yoshlar uchun ajratilgan qoʻshimcha qabul kvotalariga talabalikka tavsiya etilgan abituriyentlar (1-bosqich);

⁃ oʻqishi koʻchirilgan (koʻchirib tiklangan) talabalar.

Bunda:

⁃ qabul parametri doirasida oʻqishga tavsiya etilgan abituriyentlar bazaviy toʻlov-kontrakt shaklida bir yillik oʻqitish qiymatining kamida 25 foizi miqdorida;

⁃ tabaqalashtirilgan toʻlov-kontrakt (super) asosida oʻqish istagini bildirganlar, ular uchun belgilangan bir yillik oʻqitish qiymatining kamida 50 foizi miqdoridagi toʻlovlarni amalga oshirishi lozim.

Eslatma: amaldagi tartibga koʻra, ikkinchi va undan yuqori bosqich talabalar kontraktini toʻlash muddati OTM rahbari tomonidan uzaytirilishi mumkin.

Eslatib oʻtamiz, 2024-2025-oʻquv yili uchun kontrakt miqdorlari iyul oyida tasdiqlangandi. Moliyaviy mustaqillik berilgan davlat OTMlari belgilangan tartibga muvofiq joriy yilda qabul qilingan talabalar uchun toʻlov-kontrakt miqdorlarini mustaqil belgilash huquqiga ega.