O‘zbekistonlik 5 nafar shaxmatchi FIDE ning TOP-100 taligidan o‘rin oldi

Xalqaro shaxmat federatsiyasi (FIDE) 2025-yil yanvar oyi uchun dunyo shaxmatchilarining yangilangan reytingini e’lon qildi. Reytingda O‘zbekistonlik 5 nafar shaxmatchi o‘rin olgan.

Nodirbek Abdusattorov xalqaro ro‘yxatda 6-o‘rinda!

Ma’lum qilinishicha, Erkaklar o‘rtasidagi yangilangan reytingning yuqori o‘nligi deyarli o‘z o‘rnida qolgan bo‘lsa, o‘tgan yil dekabr oyida AQSHda kechgan rapid va blis bo‘yicha jahon chempionati, Qatarda yakunlangan nufuzli xalqaro turnir kabi musobaqalarda qayd etilgan natijalar reytingning o‘rta va quyi pog‘onasida katta o‘zgarishlarga sabab bo‘ldi.

Ushbu yangilangan reytingda dunyo shaxmatchilarining TOP-100 taligidan 5 nafar grossmeysterimiz joy oldi.

Norvegiyalik Magnus Karlsen (2831) reyting peshqadamligini saqlab qoldi. Amerikalik Fabiano Karuana (2803) va Hikaru Nakamura (2802) kuchli uchlikni yakunladi.

Hindistonlik Arjun Ergaisi (2801) va Dommaraju Gukesh(2777) Nodirbek Abdusattorov(2768)dan oldingi o‘rinlarni egalladi.

Birinchi raqamli shaxmatchimiz Nodirbek Abdusattorov 6-o‘rinda qayd etilgan vaziyatda Javohir Sindorov (2692) 37, Rustam Qosimjonov (2683) 45, Shamsiddin Vohidov (2659) 52, Nodirbek Yoqubboyev (2659) 67-pog‘onada qayd etildi.

Afruza Hamdamova ham FIDE’ning ro‘yxatiga o‘z nomini muhrladi

Shuningdek, ayollar reytingining kuchli o‘nligida 5 nafar xitoylik, 2 nafar rossiyalik, 1 nafardan Hindiston, Ukraina va Gruziya shaxmatchi qizlarining nomlari keltirilgan bo‘lsa, reytingning kuchli to‘rtligi aynan chin yurti vakillariga tegishli bo‘ldi. Reyting peshqadamligiga Xou Ifan (2633) erishgan bo‘lsa, Venszyun Szyuy (2561), Chjun’i Tan (2561), Tinsze Ley(2552) keyingi pog‘onalarda ko‘rinish berdi.

O‘zbekiston shaxmat ishqibozlari uchun quvonarli jihati, yosh qizlar o‘rtasida jahon chempionligiga erishgan Afruza Hamdamova 218 reyting ochko jamg‘argan holda TOP-100 ro‘yxatga o‘z nomini muhrladi.

Javohir Sindorov yoshlar reytingida 3-o‘rinni egallagan

Shuning bilan birga, ortda qolgan yil davomidagi musobaqalarda muvaffaqiyatli ishtirok etib kelgan yosh shaxmatchi yigitlarimizdan Javohir Sindorov yoshlar reytingida 3-o‘rinni egalladi.

TOP-100lik ro‘yxatda hamyurtlarimizdan Muhiddin Madaminov (2521) 31, Muhammadzohid Suyarov (2465) 68-qatordan joy egalladi.

Yosh qizlar reytingida Afruza Hamdamova(2354) 9, Umida Omonova(2228) 47, Guldona Karimova(2200) 62-o‘rinlarda qayd etilgani mamlakatimiz shaxmatchilarining xalqaro maydondagi natijalari yanada ortib borayotganini ko‘rsatmoqda.