Pavel Durov Fransiyada hibsga olinganidan so‘ng uch oy ichida Telegram 2000 dan ortiq foydalanuvchining ma’lumotlarini AQSh rasmiylariga topshirdi. Messenjer boti yaqinda Rossiyadan kelgan so‘rovlar haqida hech qanday ma’lumot bermagan.
2024-yilda Telegram messenjeri AQSh rasmiylariga 900 ta so‘rovni bajarib, 2253 nafar foydalanuvchi to‘g‘risidagi ma’lumotlarni taqdim etdi, deb yozadi 404 Media ixtisoslashtirilgan sayti Telegram Transparency Repors boti ma’lumotlariga tayanib. 1 yanvardan 30 sentabrgacha Telegram AQShdan jami 108 foydalanuvchiga ta’sir qilgan «IP manzillar va/yoki telefon raqamlari» bo‘yicha bor-yo‘g‘i 14 ta so‘rovni bajargani inobatga olinsa, bu 2024-yil avgustida Fransiyada messenjer asoschisi Pavel Durov hibsga olinganidan so‘ng taqdim etilgan ma’lumotlarning katta o‘sishidan dalolat beradi, deb ta’kidlaydi 404 Media.
Ayni paytda, bot 30-sentabrdan keyin Rossiyadan kelgan so‘rovlar bo‘yicha ma’lumot bermayapti, deb yozdi The Moscow Times 8-yanvar, chorshanba kuni va kompaniya hisobotiga ko‘ra, Telegram 2024-yil to‘qqiz oyida Rossiya Federatsiyasidan birorta ham so‘rovni bajarmaganini ta’kidladi.
Telegram maxfiylik siyosatidagi o‘zgarishlar
Bleeping Computer ta’kidlashicha, G‘arb davlatlari messenjerga foydalanuvchi ma’lumotlari siyosatini o‘zgartirish uchun bosim o‘tkazishdan oldin Telegram terrorizm holatlarida faqat foydalanuvchilarning IP manzillari va telefon raqamlarini oshkor qilgan.
Biroq keyinroq Telegramʼning maxfiylik siyosati o‘zgartirildi va Durov kiberjinoyat, noqonuniy tovarlar savdosi va onlayn firibgarlik kabi jinoyatlar bo‘yicha foydalanuvchilar ma’lumotlarini huquqni muhofaza qilish organlariga topshirishga va’da berdi. «Agar Telegram tegishli adliya organlaridan sizning Telegramʼning xizmat ko‘rsatish shartlarini buzgan jinoiy faoliyatda gumonlanuvchi ekanligingizni tasdiqlovchi qonuniy hujjat olsa, biz so‘rovning huquqiy tahlilini o‘tkazamiz hamda sizning IP manzilingiz va telefon raqamingizni oshkor qilishimiz mumkin», deyiladi qoidalarning yangi tahririda.
Telegram asoschisi Pavel Durov 2024-yil 24-avgust kuni Fransiyada kiberjinoyat ishi bo‘yicha hibsga olingan edi. U rasmiylar bilan hamkorlik qilishdan bosh tortganlikda va Telegramʼda yetarlicha moderatsiya yo‘qligi uchun bolalar pornografiyasi, giyohvand moddalar savdosi va firibgarlikda ishtirok etganlikda ayblangan. Bir necha kundan so‘ng Durov Fransiyani tark etmaslik va politsiyaga muntazam xabar berib turish sharti bilan garov evaziga qo‘yib yuborildi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
