Farg’onada 40 dan ortiq odamning shaxsiy fotosuratlarini tarqatgan shaxs qo’lga olindi

Ruxsatsiz tarqatilgan ma’lumotlar va gumonlanuvchining iqrori

Tezkor surishtiruv natijasida Farg‘ona viloyati Buvayda tumanida yashovchi yigit mazkur kanalni yaratib, boshqarib kelgani aniqlangan. U shaxsiy fotosuratlar va videolarni ularning egalari roziligisiz tarqatish uchun Telegramdan foydalangan.

So‘roq paytida gumonlanuvchi materiallarni uchinchi shaxslardan olgani va ularni tarmoqqa tarqatganini tan oldi. Tergovchi savoliga javoban u: “Menga materiallarni jo‘natishdi, men esa shunchaki tarqatdim”, – deb javob berdi.

Internet jinoyatlari uchun javobgarlik

Shaxsiy ma’lumotlarni ruxsatsiz tarqatish qonuniy javobgarlikka olib keladi va bunday harakatlar uchun Jinoyat kodeksi bo‘yicha qat’iy chora belgilangan. Internet orqali tuhmat qilish Jinoyat kodeksining 139-moddasiga ko‘ra ikki yuzdan to‘rt yuz baravarigacha bazaviy hisoblash miqdorida jarima yoki 300 dan 360 soatgacha majburiy jamoat ishlari bilan jazolanadi. Shuningdek, ikki yildan uch yilgacha tuzatish ishlari yoki bir yilgacha ozodlikni cheklash jazosi qo‘llanilishi mumkin.

Internetda haqorat qilish esa 140-modda bo‘yicha ikki yuzdan to‘rt yuz baravarigacha bazaviy hisoblash miqdorida jarima, 240 dan 300 soatgacha majburiy jamoat ishlari yoki bir yildan ikki yilgacha ozodlikni cheklash bilan jazolanadi.

Shaxsning sha’ni va qadr-qimmatini yoki uning shaxsiy hayotining intim tomonlarini ochib beruvchi ma’lumotlarni tarqatish esa 141-3-modda bo‘yicha jazolanadi. Bu holatda to‘rt yuzdan olti yuz baravarigacha bazaviy hisoblash miqdorida jarima, 360 soatgacha majburiy jamoat ishlari yoki uch yilgacha tuzatish ishlari qo‘llanadi.

Qanday himoyalanish kerak?

Huquqni muhofaza qilish organlari fuqarolarga ijtimoiy tarmoqlardan foydalanganda ehtiyotkor bo‘lishni, shaxsiy fotosurat va videolarni begonalar bilan bo‘lishmaslikni, shuningdek, shubhali harakatlar haqida zudlik bilan huquqni muhofaza qilish organlariga xabar berishni tavsiya etdi.