2025-yildan “Sog‘lom inson – sog‘lom millat” umummilliy harakati boshlanadi.
Shavkat Mirziyoyev raisligida sport masalalari yuzasidan o‘tkazilgan videoselektor yig‘ilishida aholi orasida sog‘lom turmush tarzini targ‘ib qilishda nafaqat sport, balki to‘g‘ri ovqatlanish ham dolzarb ahamiyatga ega ekani qayd etildi.
O‘tkazilgan o‘rganishlarga ko‘ra, Oʼzbekiston aholisining 44 foizi jismoniy faol emasligi, 36 foizi to‘g‘ri ovqatlanish qoidalariga amal qilmasligi aniqlangan.
Aholi o‘rtasida boshoqli, donli mahsulot, meva-sabzavotlar isteʼmoli keskin kamayib, tuz va shakar isteʼmoli ortib borayotgani xavotirlarni yana-da kuchaytiradi. Oqibatda odamlarning 56 foizida ortiqcha vazn, 38 foizida qon bosimi bilan bog‘liq muammo bor. Yuqumli bo‘lmagan kasalliklar erta o‘limga sabab bo‘lmoqda.
Shu bois, mutasaddilarga sog‘lom ovqatlanish va jismoniy faollik targ‘iboti bilan har bir oilani qamrab olish zarurligi ko‘rsatib o‘tildi. Bu yo‘nalishda xalqchil va taʼsirchan ijtimoiy roliklar tayyorlab, har kuni markaziy telekanallarda namoyish etish lozimligi taʼkidlandi.
Umuman, bu masalalarni qonun darajasida mustahkamlab qo‘yish zarurligi, “Jismoniy tarbiya va sport to‘g‘risida”gi qonunni qisqa muddatda tubdan qayta ko‘rib chiqib, bugungi zamon talablariga moslashtirish muhimligi ko‘rsatildi.
Yig‘ilishda mutasaddilar va hududlar rahbarlarining hisobotlari, sport sohasi vakillarining takliflari tinglandi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
