Agar Rossiya bunga qarshilik qilmasa, Britaniya tinchlikparvarlik missiyasi doirasida Ukraina osmonida patrullik qilish uchun Qirollik havo kuchlarining Typhoon qiruvchilarini yuborishi mumkin, deyiladi “The Times” gazetasining 18-fevral kungi xabarida.
Nashr rasmiy London uchun quruqlikdagi “tinchlikparvar kuchlar”ga minglab askarlarni jalb qilishdan ko‘ra, qiruvchi samolyotlarni yuborish osonroq bo‘lishini taʼkidlagan. Shuning uchun havo kuchini xarajatlarni kamaytirishning muqobil varianti sifatida ko‘rib chiqish mumkin.
Shu bilan birga, nashr suhbatdoshlari “havo patrul missiyasi”ni amalga oshirish uchun katta sarmoya, jumladan, samolyotlarning o‘zlari va havo hujumidan mudofaa tizimlarini yetkazib berish talab qilinishini aytgan.
Bundan tashqari, unda Rossiya TIV rahbari Sergey Lavrovning har qanday tinchlik kelishuvi doirasida NATO kuchlarining Ukrainaga joylashtirilishi Moskva uchun nomaqbulligi haqidagi bayonotlari esga olingan.
Qayd etilishicha, Ukraina osmonida patrullik qilish bo‘yicha taklif etilayotgan missiya NATOning Boltiqbo‘yi mamlakatlaridagi o‘xshash missiyalari modeli bo‘yicha tashkil etilishi mumkin. Qirollik havo kuchlaridagi manbaning “The Times” nashriga aytishicha, bu variant Ukraina uzra parvozlar taqiqlangan hudud yaratishdan ko‘ra ko‘proq, chunki buning uchun samolyotlar havo bo‘shlig‘ini sutkada 24 soat nazorat qilishi kerak.
O‘z navbatida, nashrning Britaniya hukumatidagi manbasiga ko‘ra, “havo politsiyasi” missiyasi maqsadga muvofiq bo‘ladi, ammo buning uchun juda ko‘p sonli qiruvchi samolyotlar, shuningdek ularni himoya qilish uchun havo hujumidan mudofaa tizimlari kerak bo‘ladi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
