Prezident Shavkat Mirziyoyev 14-aprel kuni Sea Breeze Uzbekistan xalqaro turizm markazining master-rejasi taqdimoti bilan tanishdi, deb Prezident matbuot xizmati xabar berdi.
Mamlakatdagi qulay investitsiya muhiti tufayli barcha sohalarga ilg‘or g‘oyalar kirib kelmoqda, yangi majmualar barpo etilmoqda.
Xususan, turizmda so‘nggi yillarda 2 mingdan ortiq yangi tadbirkor ish boshladi. O‘tgan yili xorijiy sayyohlar tashrifi ilk bor 10 milliondan oshdi. Birgina Toshkent viloyatining Bo‘stonliq hududida Amirsoy va Ugam River kabi kurortlar, “Beldirsoy—Chimyon—Nanay” turizm maskanlari tashkil etildi.
Bunday rivojlanish surʼati chet ellik investorlarni ham o‘ziga tortmoqda. Jumladan, Chorvoq suv ombori bo‘yida Sea Breeze Uzbekistan xalqaro turizm markazi qurilishi haqida avval xabar berilgan edi. Bu galgi taqdimotda ushbu yirik loyihaning bir nechta xorijiy kompaniyalar ishtirokida ishlab chiqilgan master-rejasi ko‘rib chiqildi.
Taʼkidlanganidek, turizm markazini 10 ta kichik hududga bo‘lib qurish ko‘zda tutilmoqda. Ularning har biri piyoda borish mumkin bo‘lgan ko‘ngilochar maskan va xizmatlarni qamrab oladi. Ikki qirg‘oq o‘rtasida ko‘prik qurilib, keluvchilarga qulaylik oshiriladi. Suv bo‘yida xiyobon, plyaj va dam olish joylari bo‘lsa, qiyaliklarda mehmonxonalar, kottejlar, uylar, restoran va tomoshagohlar bo‘ladi. Shuningdek, madaniyat, taʼlim, tibbiyot, sport maskanlari barpo etiladi. Yaʼni bu yerda faqat sayohat emas, balki yil davomida yashash imkoniyati ham yaratiladi.
Davlat rahbari bu loyiha barcha tashrif buyuruvchilarga qulay bo‘lishi lozimligini taʼkidlab, majmuani zarur infratuzilma bilan taʼminlash bo‘yicha ko‘rsatmalar berdi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
