“Dok1 Maks” va boshqa 3,2 mln.dan ortiq zararli dori vositalari yo‘q qilinmoqda

Majburiy ijro byurosining Toshkent shahar boshqarmasi tomonidan sud qaroriga asosan jami 3 mln. 200 mingdan ziyod zararli dori vositalari yo‘q qilinmoqda.

Ular orasida yurtimizda 68 nafar bolaning halok bo‘lishi, 16 nafar bolaning nogiron bo‘lib qolishiga sababchi bo‘lgan “Dok1 Maks” siropi ham bor.

Jumladan:

811 ming 478 dona “Dok1 Maks” tabletkasi,

101 ming 669 dona “Dok1 Maks” siropi,

2 mln. 252 ming 796 dona “Ambronol” tabletkasi,

56 ming 672 dona “Ambronol” siropi tegishli tartibda yo‘q qilinmoqda.

Jarayon Vazirlar Mahkamasining 200-sonli qaroriga muvofiq, huquqni muhofaza qiluvchi organlar, sanitariya-epidemiologiya xizmati, ekologiya qo‘mitasi va xolislar ishtirokida amalga oshirilmoqda.

Dori vositalari ekologiya va atrof muhitga zarar yetkazmagan holda maxsus pechlarda yoqilmoqda.