Yo‘l harakati xavfsizligi xizmati ma’lumotlariga ko‘ra, so‘nggi uch oyda 60 mingdan ortiq haydovchi jarima ballarini oldi. Ushbu tizim Vazirlar Mahkamasi qaroriga asosan 2024-yil iyunidan boshlab joriy etilgan.
Statistikaga ko‘ra, 4 nafar haydovchi 5 ballgacha, 14 nafar haydovchi 4 ballgacha, 129 nafar haydovchi 3 ballgacha, 4 976 nafar haydovchi 2 ballgacha, 63 974 nafar haydovchi esa 1 ballgacha jarima olgan. Shu bilan birga, 9 million 325 ming haydovchi umuman jarima ballari olmagan.
2024-yil iyun–avgust oylarida 285 mingdan ortiq qoidabuzarlik qayd etilgan bo‘lsa, 2025-yilda bu ko‘rsatkich 168 mingtani tashkil etgan. Natijada qoidabuzarliklar soni 58 foizga kamaygan.
Yo‘l-transport hodisalari ham kamaygani kuzatilmoqda: 2024-yil yozida 531 ta YTH sodir bo‘lgan bo‘lsa, 2025-yilda bu ko‘rsatkich 338 taga tushib, 36 foizga qisqargan.
Mutasaddilar fikricha, jarima ballari tizimi qoidabuzarliklarni kamaytirishda va yo‘llarda xavfsizlikni oshirishda ijobiy natija bermoqda.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
