2025-yilning birinchi yarmida global avtomobil bozori sezilarli o‘zgarishlarga boy bo‘ldi. An’anaviy ishlab chiqaruvchilar va elektromobil gigantlari o‘rtasidagi raqobat kuchayib, kuchli 15 talik ro‘yxatda asosan Osiyo brendlari ustunlik qildi. Yilning yarmida qaysi brend yetakchi bo‘ldi?
Toyota — bozordagi mutlaq lider
Toyota 2025-yilning birinchi yarmida 4,73 milliondan ortiq avtomobil sotish orqali raqobatchilardan ancha oldinda bormoqda. Bu o‘tgan yilga nisbatan 6 foiz ko‘p bo‘lib, brendning Shimoliy Amerika, Osiyo va boshqa yirik bozorlaridagi barqaror mavqeini yana bir bor tasdiqlaydi.
Dunyo asta-sekin elektromobil davriga o‘tayotganiga qaramay, Toyota keng model qatori va global ishlab chiqarish tarmog‘i bilan yetakchiligini saqlab kelmoqda.
BYD — eng tez o‘sayotgan brend
Yilning eng sezilarli hodisalaridan biri — Xitoyning BYD brendi keskin o‘sishga erishgani bo‘ldi. Kompaniya yarim yillikda 2 milliondan ortiq avtomobil sotib, global reytingda to‘rtinchi o‘rinni egalladi.
31 foizlik yillik o‘sish — kuchli brendlar orasidagi eng yuqori ko‘rsatkich. Mutaxassislarning qayd etishicha, BYD shu sur’atda davom etsa, yil oxiriga borib Ford’ni ortda qoldirishi mumkin.
Brend muvaffaqiyatining asosiy omillari:
- Xitoyning jadal rivojlanayotgan elektromobil bozori,
- Yevropa va Lotin Amerikasida kengayib borayotgan sotuvlar,
- Arzon, lekin texnologik jihatdan rivojlangan elektromobil modellari.
Boshqa yirik brendlar natijalari
2025-yilning birinchi yarmi an’anaviy ishlab chiqaruvchilar uchun turlicha kechdi:
- Honda, Nissan, Mercedes, Audi — 2–7% oralig‘ida sotuv pasayishi kuzatildi.
Bunga Yevropadagi umumiy iqtisodiy noaniqlik va elektromobillarga o‘tish sur’atining sekinlashuvi ta’sir ko‘rsatdi. - Hyundai, Kia, Chevrolet esa barqaror o‘sishni davom ettirib, yangi modellar va qulay narx siyosati bilan bozordagi mavqeini mustahkamladi.
2025-yilning eng ko‘p sotilgan 15 ta avtomobil brendi
- Toyota — 4 725 616
- Volkswagen — 2 320 300
- Ford — 2 075 500
- BYD — 2 004 442
- Hyundai — 1 956 774
- Honda — 1 661 200
- Suzuki — 1 631 000
- Nissan — 1 624 851
- Kia — 1 587 536
- Chevrolet — 1 490 500
- BMW — 1 070 814
- Geely — 992 616
- Mercedes — 899 974
- Renault — 808 674
- Audi — 783 531
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
