Bugun, 6-iyun kuni Sanitariya-epidemiologik osoyishtalik va jamoat salomatligi qo’mitasi tomonidan «Ovqatdan zaharlanishning oldini olish borasida amalga oshirilayotgan ishlar» mavzusida matbuot anjumani o’tkazildi.
Anjumanda Respublika ixtisoslashtirilgan epidemiologiya, mikrobiologiya yuqumli va parazitar kasalliklar ilmiy-amaliy tibbiyot markazi mutasaddi vakillari, yuqumli kasalliklar shifoxonalari xodimlari va ommaviy axborot vositalari vakillari ishtirok etdi.
Anjuman 2024-yilda «Oziq-ovqat xavfsizligi: kutilmagan vaziyatlarga tayyorlaning!» shiori ostida bo’lib o’tadigan 7-iyun Butunjahon oziq-ovqat xavfsizligi kuni munosabati bilan o’tkazildi. Tadbirda ma’lum qilinishicha, har yili xavfli oziq-ovqat mahsulotlarini iste’mol qilish natijasida 600 millionga yaqin inson jabrlanadi, 420 ming kishi mikroorganizmlar yoki kimyoviy moddalar bilan ifloslangan oziq-ovqatlarni iste’mol qilish natijasida vafot etadi. Achinarlisi, ularning 125 ming nafarini 5 yoshgacha bo’lgan bolalar tashkil etadi.
2024-yilning o’tgan I choragida 18 ta ovqatdan zaharlanish holatlari qayd etilgan bo’lib, bunda 143 nafar fuqarolar jabrlangan.
Anjumanda ishtirok etgan demokrat.uz muxbirining oziq-ovqat sotuvi bilan shug’ullanuvchi tadbirkorlar faoliyatini nazorat qilish qanday amalga oshirilishi haqidagi savoliga Sanitariya-epidemiologik osoyishtalik va jamoat salomatligi qoʻmitasi boʻlim boshligʻi Abdurahmon Ismoilov bunday nazorat uchun qo’mitada xodimlar yetishmovchiligi kabi muammolar borligini aytib, bunda jamoatchilik nazoratini shakllantirish kerak deb javob berdi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
