AQSH Moliya vazirligi 4-noyabr kuni Shimoliy Koreyaga aloqador yangi sanksiyalar paketini e’lon qildi. Bu haqda Reuters axborot agentligi xabar berdi.
Yangi cheklovlar Shimoliy Koreya, Xitoy va Rossiya fuqarolari hamda tashkilotlariga nisbatan joriy etilgan. Sanksiyalar ro‘yxatiga jami 8 nafar fuqaro va 2 ta tashkilot — Korea Mangyongdae Computer Technology Corp. hamda Ryujong Credit Bank kiritilgan.
AQSHning maqsadi — uchinchi tomon aloqalarini ham to‘xtatish
Moliya vazirligi bayonotida ta’kidlanishicha, ushbu chora-tadbirlar Shimoliy Koreya bilan noqonuniy moliyaviy yoki texnologik aloqada bo‘lgan uchinchi tomonlarni ham javobgarlikka tortishga qaratilgan.
Ya’ni, sanksiya ostidagi davlat yoki tashkilotlar bilan hamkorlik qilgan boshqa yuridik yoki jismoniy shaxslar ham AQSH tomonidan jazolanishi mumkin.
Avvalgi sanksiyalar haqida
AQSH so‘nggi yillarda Shimoliy Koreyaga nisbatan bir necha bor sanksiyalar joriy etgan. Ularning ayrimlari quyidagilar:
-
2016-yil mart oyida — mamlakat hukumati va tashkilotlariga ballistik raketa va yadroviy dasturlardagi ishtiroki uchun;
-
2020-yilda — fuqarolarni chet elga yuborib daromad olishni ta’minlovchi tashkilotlarga qarshi;
-
2021-yilda — inson huquqlarining buzilishi uchun;
-
2023-yilda — xalqaro agentlar va kiberjinoyatchilarga qarshi;
-
2025-yil iyul oyida — Korea Sobaeksu Trading Company va unga aloqador uch shaxsga yadroviy va raketa dasturlarini qo‘llab-quvvatlagani uchun sanksiyalar joriy etilgan edi.
AQSH hukumati bu orqali Pxenyanning yadroviy faoliyatini moliyalashtirish va tashqi texnologik aloqalarini cheklashni maqsad qilmoqda.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
