Tramp BBC’ni 5 mlrd dollar jarimaga tortmoqchi

AQSH prezidenti Donald Tramp Britaniyaning BBC telekanalini o‘z nutqini noto‘g‘ri tahrirlab, buzib ko‘rsatganlikda ayblab, uni 5 milliard dollargacha jarimaga tortish niyatida ekanini ma’lum qildi. Bu haqda BBCning o‘zi xabar berdi.

Trampning aytishicha, yaqin kunlarda telekanalga nisbatan rasmiy da’vo arizasi sudga topshiriladi.

“Ulardan bir milliarddan besh milliard dollargacha jarima talab qilib, da’vo ochamiz. Bu katta ehtimol bilan keyingi haftada bo‘ladi. Men bunga majburman. Ular aldaganini tan olgan”, — dedi prezident.

BBC uzr so‘radi, ammo tovon to‘lashdan bosh tortdi

Ma’lumotlarga ko‘ra, Trampning yuristlari BBC’ga rasmiy maktub yuborgan. Unda:

• 2021-yil 6-yanvardagi Tramp nutqi noto‘g‘ri tahrirlangani,
• bu montaj prezidentning obro‘siga va moliyaviy holatiga jiddiy zarar yetkazgani,
• BBC uzr so‘rab, kompensatsiya to‘lashi kerakligi

ta’kidlangan.

BBC uzr so‘ragan, biroq tovon puli to‘lashdan bosh tortgan. Shundan keyin Tramp bu ishni sudga oshirishini e’lon qilgan.

Bahsga sabab — 6-yanvar voqealari haqidagi film

BBC’ning Panorama dasturida efirga uzatilgan hujjatli filmda Trampning nutqidan olingan uchta alohida lavha birlashtirilib ko‘rsatilib, 6-yanvar Kapitoliy voqealari bilan bog‘liqlik haqidagi taassurot kuchaygan.

Tramp yuristlari bu montajni:

• “soxta”,
• “tuhmat”,
• “qo‘zg‘olonni rag‘batlantirgani haqida noto‘g‘ri tasvir yaratuvchi montaj”

deya baholagan.

Prezident GB News’ga bergan intervyusida BBC’ni “noqonuniy ish tutgan” deya aybladi va bu holatni saylovlarga aralashish bilan tenglashtirdi.

“Asl nutqim chiroyli edi, lekin ular uni buzib ko‘rsatgan. Bu soxtalikdan ham yomon — buzuqlik”, — dedi Tramp.

BBC ichida ham o‘zgarishlar bo‘ldi

Hodisa ortidan:

• BBC raisi Samir Shah Oq uyga shaxsan uzr yetkazgani,
• Britaniya parlamentiga bu tahrirni “xatolik” deb ta’riflagani,
• BBC’dagi bir qator yuqori lavozimli rahbarlar — jumladan, direktor Tim Deyvi va yangiliklar bo‘limi rahbari Debora Tarness — iste’fo bergani

ma’lum qilingan.