Qirg‘izistonda bir guruh siyosiy arboblar, jumladan sobiq prezident Almazbek Atambayevning o‘g‘li Qodirbek Atambayev qo‘lga olindi. Bu haqda mahalliy 24.kg nashri xabar berdi.
Qo‘lga olinganlar orasida:
- MXDQ Davlat qo‘riqlash xizmati sobiq rahbari Damir Musakeyev,
- Sotsial-demokratlar partiyasi yetakchisi Temirlan Sultonbekov,
- parlamentning sobiq deputatlari Shaylobek Atazov va Kubanichbek Qodirov ham bor.
Tergov ayblovlari
Ichki ishlar vazirligi ma’lumotiga ko‘ra, jami 10 nafar shaxs “parlament saylovlari yakunlari fonida ommaviy norozilik kayfiyati mavjud” degan tasavvur yaratish maqsadida mitinglar uyushtirishni rejalashtirgan. Ularga quyidagilar aytilmoqda:
- konstitutsiyaga zid talablarni ilgari surish,
- davlat binolari, telekanallar va kuch tuzilmalari obyektlarini egallashga urinish,
- qurol-yarog‘ni qo‘lga kiritish,
- tartibsizliklarga jinoyat olami vakillarini jalb qilish.
IIV xabariga ko‘ra, tintuvlar davomida qurol-yarog‘, o‘q-dorilar, granatalar, aloqa vositalari, rejalar, moliyaviy hujjatlar, giyohvand moddalar va 150 ming dollar musodara qilingan.
Qonuniy jarayon
Ushlanganlarga Qirg‘iziston Jinoyat kodeksining quyidagi moddalariga asosan ayblov e’lon qilindi:
- 278-modda — “Ommaviy tartibsizliklarni tashkil etish” (7 shaxs),
- 326-modda — “Hokimiyatni zo‘rlik bilan egallash” (3 shaxs),
- shuningdek, 36-modda — “Jinoyatga tayyorgarlik ko‘rish” va
- 41-modda — “Jinoyat ishtirokchilarining turlari”.
Sud qaroriga ko‘ra, barcha gumonlanuvchilar 2026-yil 17-yanvargacha tergov izolyatorida qoladi.
Saylovlar oldidan keskinlashgan vaziyat
Qirg‘iziston parlamentiga muddatidan oldingi saylovlar 30-noyabr kuni bo‘lib o‘tadi. Avvalgi reja bo‘yicha saylov 2026-yil noyabrida o‘tkazilishi kerak edi, biroq 25-sentyabr kuni deputatlar o‘z vakolatlarini muddatidan oldin topshirgan.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
