2025-yil 5-sentabr kuni Turizm qoʻmitasida “Oʻzbekistonda faol va sport turizmi” mavzusida davra suhbati boʻlib oʻtdi. Tadbirda sohaning bugungi holati va istiqbollari muhokama qilindi.
Davra suhbatini Turizm qoʻmitasi raisining oʻrinbosari Sardor Niyozov ochib berdi. U faol va sport turizmi mamlakatda turizmning muhim yoʻnalishlaridan biri ekanini taʼkidladi.
Tadbir ilmiy-amaliy loyihaning yakunlanishini belgiladi. Loyiha doirasida xalqaro tajriba oʻrganilib, amaliy tavsiyalarni oʻz ichiga olgan «yoʻl xaritasi» ishlab chiqildi. Unda:
- milliy muvofiqlashtirish markazini tashkil etish;
- yoʻnalishlar va ruxsat berish tartib-taomillari uchun “yagona darcha” raqamli platformasini joriy etish;
- ekologik barqarorlikka eʼtibor qaratgan holda infratuzilmani rivojlantirish;
- ixtisoslashtirilgan qutqaruv xizmatini shakllantirish;
- yoʻriqchi-yoʻl boshlovchilarni tayyorlash va sertifikatlash dasturlarini yoʻlga qoʻyish kabi chora-tadbirlar nazarda tutilgan.
Uchrashuvda qayd etilganidek, Oʻzbekistonning xilma-xil relyefi, tabiiy manzaralari va faol dam olishga qiziqishning ortib borishi ushbu yoʻnalishni rivojlantirish uchun keng imkoniyatlar yaratmoqda.
Tadbir yakunida yoʻriqchi-yoʻl boshlovchilarga diplom topshirish marosimi oʻtkazildi. Bir yildan ortiq taʼlim olgan 35 nafar mutaxassisga kasbiy tayyorgarlik hujjatlari taqdim etildi. Dastur amaliy mashgʻulotlarni, jihozlardan foydalanish, xavfsizlikni taʼminlash hamda joyni moʻljallash kabi zarur koʻnikmalarni qamrab oldi.
Bunday diplomlar mamlakatda ilk bor berildi va kelgusida yangi guruhlarni oʻqitish rejalashtirilmoqda.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
