Наманган вилояти Қамчиқ довонида 11 октябрь куни юк машиналари тўқнашуви содир бўлди. Бу ҳақда Фавқулодда вазиятлар вазирлиги ахборот хизмати хабар берди.
Хабарга кўра, ҳодиса 11 октябрь куни соат 05:45 да А-373 Тошкент-Ўш халқаро автомобиль йўлининг 222,5 километри, Қамчиқ довони қисмида содир бўлган. Водий-Тошкент йўналишида ҳаракатланиб кетаётган «Volvo» русумли юк машинаси ҳайдовчиси кутилмаганда бошқарувни йўқотиб, қарама-қарши йўналишга чиқиб кетган ва 5 тонналик ҳамда 8 тонналик «Isuzu» юк машиналари билан тўқнашган. Йўл-транспорт ҳодиссаси оқибатида 8 тонналик «Isuzu» юк машинасида ёнғин келиб чиққан.
Зудлик билан воқеа жойига ФВВнинг «Қамчиқ» Махсус қидирув, ёнғин-қутқарув бошқармаси қутқарувчилари ва ЙПХ ходимлари етиб борган. Қутқарувчилар махсус асбоб-анжомлар ва техникалар ёрдамида ёнаётган машинани соат 06:07 да ўчиришган. Шунингдек, ҳодиса оқибатларини бартараф этишга Фавқулодда вазиятлар давлат қуйи тизимига кирувчи ташкилотлар куч-воситалари ҳам жалб этилган.
Қайд этилишича, қутқарувчилар томонидан воқеа жойида жабрланган 3 нафар юк машиналари ҳайдовчиларига биринчи тиббий ёрдам кўрсатилиб, малакали тиббий ёрдам кўрсатиш учун шифохонага юборилган. Ҳодиса оқибатида халок бўлганлар йўқ.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
