Ritz-Carltonнинг орзиқиб кутилган суперяхтаси биринчи саёҳати бошланиши режалаштирилганидан уч ярим йил ўтиб, ниҳоят ўзининг дебютини амалга оширди. Бу ҳақда CNN хабар қилмоқда.
Машҳур меҳмонхоналар тармоғининг Ritz-Carlton Yacht Collectionдаги махсус тайёрланган учта яхтадан биринчиси Evrima 15-октабр куни Испаниянинг Барселона шаҳридан Франциянинг Ница шаҳрига етти кечалик саёҳатини бошлади.
298 йўловчини сиғдира оладиган 190 метрлик кема алоҳида айвонларига эга. Шунингдек, полдан шифтгача деразалари бўлган 149 та люкс «хона»дан иборат. Яхтада чексизлик ҳовузи, вино омбори, тунги клуб ва бошқа кўнгилочар жойлари мавжуд.
Ўрта ер денгизидаги саёҳат учун бир ҳафталик турар-жой нархи киши бошига 6 400 доллардан бошланади. Кариб денгизи саёҳатларининг эса арзони бир киши учун 5 100 доллар экани айтилмоқда. Турар-жой вариантлари стандарт кабиналардан тортиб, хусусий иссиқ ванна билан икки қаватли лофт типидаги квартираларни ташкил қилади.
Шунингдек, бортда тўрт ёшдан 12 ёшгача бўлган болалар учун мўлжалланган махсус муассаса ҳам мавжуд. Юнонча «кашфиёт» деган маънони англатувчи Эврима, Ўрта ер денгизи, Кариб денгизи, шунингдек, Марказий ва Жанубий Aмерика бўйлаб бир қатор йўналишларга сузиб боради. Саёҳат давомийлиги етти кундан 10 суткагача.
Ҳашаматли яхта ортидан Франциянинг Saint-Nazaire шаҳридаги Chantiers de l’Atlantique кемасозлик заводида қурилаётган lma ва Luminara олиб келиниши кутилмоқда. «Ритз-Карлтон яхталари тўплами ҳашаматли круизлик саноатида инқилобий ўзгаришларни юзага келтирмоқда. У тенгсиз саёҳатлар, дид билан танланган йўналишлар ва мутлақо ноёб тоифани яратмоқда», – деди Ritz-Carlton Yacht Collection компаниясининг ижрочи директори Douglas Prothero.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
