Қайсидир ташкилотда юқори лавозимларда ишловчи танишлари борлигига ўзгани ишонтиришга уринган шахс қонун олида жавоб берадиган бўлди.
Фирибгарликни одат қилиб олган кимса бу гал 10.000 АҚШ долларини қўлга киритишга уринади. Аммо унинг хом хаёллари Бош прокуратура ҳузуридаги иқтисодий жиноятларга қарши курашиш департаменти ҳамда ДХХ Фарғона вилояти бошқармалари билан ҳамкорликда ўтказилган тезкор тадбирда чипакка чиқди.
Қайд этилишича, гумонланувчининг ўзгалар қўйнини пуч ёнғоққа тўлдиришда тажрибаси яхшигина. Ҳудди шу турдаги жиноятлари билан илгари бир неча марта қонун қаршисига келган шахс мақсадга эришиш учун қурувчидан пул талаб қилади. Яъни шаҳар марказида кўп қаватли бино қурилишини қўлга киритиш учун тадбиркор унга сўралган маблағни бериши керак эди. Афсуски, текин пишлоқ, фақат қопқонда бўлади. Фирибгар талаб қилинган маблағнинг 4000 долларини аванс тариқасида олаётган вақтда ашёвий далиллар билан ушланди.
Шуни айтсалар керакда, ўрганган кўнгил ўртанса, қўймас деб. Оқибатда эса нафсини енга олмаган фирибгарнинг қилмиши қимматга тушди.
Айни пайтда мазкур ҳолат юзасидан Жиноят кодексининг тегишли моддалари бўйича тергов ва суруштирув ишлари олиб борилмоқда.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
