Ҳарбий ҳаракатлар туфайли уйини ташлаб, мамлакатнинг бошқа ҳудудларига кетишга мажбур бўлган миллиондан ортиқ украиналик зудлик билан ёрдамга муҳтож. БМТ ана шундай маълумот бермоқда. Бошпанасидан ажралган одамларнинг аксарияти ҳозир ғарбий Украинада яшаб турибди. Юкламалар ортгани боис маҳаллий инфратузилма аранг ишламоқда.
БМТ Бош котибининг матбуот котиби Стефан Дюжаррик таъкидлашича, айни пайтда бир миллион кўчирилган одам 5670 та жойда вақтинчалик бошпана ва мадад изламоқда. Улар қиш яқинлашаётгани сабабли ёрдамга муҳтож. Айниқса, зудлик билан қишки кийим-кечак, кўрпа-тўшак, кўчма печка ва қаттиқ ёқилғи олиш талаб этилмоқда.
Расмий маълумотларга кўра, хорижда урушдан қочиб кетган украиналиклар сони бундан ҳам кўпроқ. Бирлашган Миллатлар Ташкилотининг маълумотларига кўра, Россия босқини бошланганидан кейин мамлакатни тарк этишга мажбур бўлган Украина фуқароси ҳозирда биргина Европанинг ўзида 7,7 миллиондан ортиқ. Украина ҳукумати улардан баҳоргача яшаб турган мамлакатларида қолишни сўрамоқда. Бир кун аввал Бош вазир ўринбосари Ирина Верешчук айтганидек, Россия армиясининг зарбалари туфайли Украинанинг энергетика тармоқлари заифлашди ва улар юкламалар ортишини кўтара олмаслиги мумкин.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
