Бугун Fly Dubai авиакомпаниясининг Тошкентдан Дубайга учаётган самолёти фавқулодда Эроннинг Шероз шаҳридаги аэропортга қўндирилган.
«Uzbekistan Airports» АЖ ахборот хизмати маълум қилишича, ушбу жараён авариявий ҳолат билан боғлиқ эмас.
Хабарда айтилишича, фавқулодда қўнишга самолёт экипаж аъзоларидан бирининг аҳволи ёмонлашгани сабаб бўлган. Шундан сўнг, экипаж томонидан энг яқин аэропортга қўниш ҳақида қарор қабул қилинган.
Маълумот учун, бортида 172 йўловчи бўлган самолёт Тошкентдан соат 04:37 да ҳавога кўтарилган ва Тошкент вақти билан 07:50 да Дубай аэропортига қўниши керак эди. Бироқ мажбурий қўниш туфайли парвоз кечиктирилган.
Ҳозирда самолёт Дубайга учишга ҳозирлик кўряпти.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
