Wall Street таҳлилчилари йирик техно компанияларнинг даромадлари пастлаши ва энг янги iPhone’ларга бўлган талаб кутилганидан заифроқ бўлиши мумкинлиги ҳақида таҳмин қилишганди. Аммо бу ҳавотирларга қарамай, Apple сентябрь ойида якунланган чорак учун сотувлар ва даромадлар бўйича бундай тахминларни йўққа чиқарди.
Йирик техно компания ўзининг тўртинчи молиявий чорагида 90 миллиард доллардан кўпроқ савдони амалга оширди. Бу ўтган йилнинг шу даврига нисбатан 8 фоизга кўп. Фойда эса ўтган йилнинг чорагига нисбатан салкам 1 фоизга ошган.
«Қийин ва ўзгарувчан макроиқтисодий шароитга қарамай сентябрь ойидаги чорак натижаларимиз ишлаш қобилиятимиз самарасини намойиш этди», деди Apple молия директори Лука Маестри.
Apple TV+ ва Apple Music каби маҳсулотларга пуллик обуналарни ўз ичига олган компания хизматлари 19,2 миллиард долларга сотилди. Бу ўтган йилнинг чорагига нисбатан қарийб 5 фоизга кўп. Ҳозирда Apple ўз хизматлари бўйлаб 900 миллиондан ортиқ пуллик обунага эга. Шу ҳафта бошида эса Apple мусиқа ва телекўрсатув хизматлари учун нархларни оширди. Бу келгусида фойданинг ортишига ёрдам беради.
«Apple гарчи қийин муҳитда ҳам самарали натижаларга эришаётган бўлишига қарамай, бошқа йирик технология компаниялари сингари макроиқтисодий муҳитнинг ёмонлашуви ва таъминот занжири муаммоларининг салбий таъсиридан азият чекмоқда», деди Investing.com таҳлилчиси Жесси Коен.
Apple сўнгги чоракда эришиладиган молиявий даромадлар кўрсаткичи қандай бўлишини тахмин этишдан бош тортмоқда. AҚШ долларининг курсидаги ўзгаришлар ва давом этаётган макроиқтисодий инқироз туфайли сўнгги чоракда даромад ўсиши бироз паст бўлиши мумкин.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
