Jahon, Yangiliklar

Президент «пост»ини ташлаб кетди

Президент «пост»ини ташлаб кетди

Ливан президенти якшанба куни – ваколатлари тугашига бир кун қолганида Баабда саройидаги қароргоҳини тарк этди. 89 ёшли Мишель Аун қароргоҳ ходимлари ва Президент қўриқчиси билан хайрлашган. Кейин 6 йил давомида мамлакатни бошқарган давлат раҳбари Христиан эркин ватанпарварлик ҳаракатининг минглаб тарафдорлари олдида нутқ сўзлади.

Аун Ливанни 32 йилдан бери қўлида ушлаб турган коррупция тизимига қарши курашни давом эттириш қатъиятини эълон қилди. У молиявий инқироз, давлат маблағларини ўзлаштириш ва фуқароларнинг пул бадалларини ўғирлашда айбдор бўлган барча шахсларни жавобгарликка тортиш зарурлигини таъкидлади.

Унинг фикрича, ҳозирги вазият катта саъй-ҳаракатларни талаб қилади. Чунки Ливан жуда кўп йўқотишни бошдан кечирган. Бу саъй-ҳаракатларсиз азоб-уқубатларга барҳам бериш имконсиз экани қайд этилди.

Таҳлилчиларнинг таъкидлашича, Мишель Аун қароргоҳни тарк этиб, давлат раҳбари креслосини бўш қолдирган. 29 сентябр, 13 ва 20 октябрь кунлари Ливан парламентида сайловнинг учта босқичи бўлиб ўтди. Унда президентликка номзодларнинг ҳеч бири 128 депутатдан 65 нафарининг қўллаб-қувватлашига эриша олмади. Конституцияга кўра, агар президентлик ваколати тугаганидан кейин унинг лавозими бўш қолса, давлат раҳбарининг функцияларини вақтинча ҳукумат ўз зиммасига олади.