Франциянинг Дё Севр департаменти намойишчилари минтақадаги қишлоқ хўжалиги мега-фермалари эҳтиёжлари учун қурилган улкан сув идишини таъминлаб турувчи қувурни ер остидан қазиб, унинг бир қисмини суғуриб олди.
Якшанба куни Франция ғарбида фермер хўжаликларини суғориш учун мўлжалланган сув омбори қурилишига қарши намойишлар давом этди. Бир кун аввал намойишчилар ва полиция ўртасида шиддатли тўқнашувлар бўлиб ўтди.
Дё-Севр департаментининг Сен-Солин қишлоғидаги тартибсизликлардан бир кун ўтиб, намойиш иштиркчилари сайтга киришга янги уринишларни амалга оширмади. Лекин улар мега-сув омборига олиб борадиган таъминотни йўқ қилди. Расмийларга кўра, намойишларда 2000 га яқин одам қатнашган.
Намойишчилар лойиҳага қарши бўлган фермер томонидан қарзга олинган ер участкасини эгаллаб олган. Бу ерда эски «Галлиc қишлоғи» тамойили бўйича ёғоч қўриқ миноралари қурилган. Намойишчиларнинг сўзларига кўра, бу истеҳкомлар ҳудуддаги «мухолифатни мустаҳкамлаш» учун қилинган.
Шанба куни бўлиб ўтган кенг кўламли норозилик намойишлари натижасида, расмий маълумотларга кўра, 61 нафар полициячи тан жароҳати олган, улардан 22 нафари оғир яраланган ҳолда шифохонага ётқизилган эди. Маҳаллий префектнинг маълум қилишича, полициячиларнинг баъзилари олов ва портловчи воситалар билан ҳужумга учраган. Тўрт намойишчи яраланган, олти нафари ҳибсга олинган, дея қўшимча қилди префект.
Бир неча минг киши ҳукуматнинг қишлоқда режалаштирилган сув омбори яқинида намойиш ўтказишга қўйган тақиқини бузди. Француз телевидениеси намойишчиларнинг далалар орқали девор билан ўралган қурилиш майдонига ўтаётганини ва кўздан ёш оқизувчи газдан яширинишга уринаётганини намойиш этган.
Франция Қишлоқ хўжалиги вазири Марк Фесно Twitter’да полицияга қарши зўравонликни қоралади ва намойишчиларни «кўп йиллар давомида маҳаллий даражада ишлаб чиқилган лойиҳани блокировка қилиш ниятида» дея танқид қилди.
Франциянинг ғарбий қисмида бу ёзда қайд этилган кучли қурғоқчилик Европа Иттифоқининг энг йирик қишлоқ хўжалиги минтақасида сув ресурслари бўйича баҳсларни янада кучайтириб юборди. Сунъий сув ҳавзаларини яратиш ғояси баъзи йирик фермерлар томонидан сувдан самарали фойдаланиш усули сифатида қўллаб-қувватланди. Шу билан бирга, бундай мегатанклар тармоғини яратиш режаси танқидчилар томонидан жуда йирик фермерларни қўллаб-қувватлаш ҳаракати сифатида қораланди.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
