Бирлашган Миллатлар Ташкилоти Бош котиби Антониу Гутерриш Мисрда бўлиб ўтган COP27 иқлим конференциясининг очилишидаги нутқида инсоният юқори тезлик билан иқлим жаҳаннамига томон “ошиқаётганини” таъкидлади. Гутерриш ривожланган ва ривожланаётган мамлакатларни иқлим бўйича бирдамлик пактини тузишга чақирди.
Бош котиб, глобал ҳарорат кўтарилишда давом этаётгани ва инсонлар сайёра иқлим бетартиблигини қайтариб бўлмайдиган қилиб қўядиган кескин нуқтага тезроқ яқинлашишига сабаб бўлаёганини қайд этди. «Биз иқлим жаҳаннамига олиб борадиган шосседа турибмиз, оёғимиз эса тезлатгичда. Шунинг учун, COP27 бошида мен ривожланган ва ривожланаётган мамлакатлар ўртасида тарихий пакт, Иқлим бирдамлиги пактини тузишга чақираман», — деди Гутерриш.
Унинг сўзларига кўра, ушбу пактда барча давлатлар глобал исишни 1,5 даражада ушлаб туриш мақсадига биноан жорий ўн йилликда атмосферага чиқиндиларни камайтириш учун қўшимча ҳаракатларни амалга ошириш имконига эга экани белгиланади. Бундан ташқари, бой давлатлар ва халқаро молия институтлари ривожланаётган мамлакатларга қайта тикланадиган энергияга ўтишни тезлаштиришга ёрдам бериш учун молиявий ҳамда техник кўмак кўрсатади.
Бирлашган Миллатлар Ташкилоти Бош котиби таъкидлаганидек, пакт қазиб олинадиган ёқилғига қарамликни тугатиш ва кўмирда ишлайдиган электр станциялари қурилишини тўхтатишни назарда тутади. Шунингдек, 2030 йилгача ИҲТТ мамлакатларида тош кўмирдан ва бошқа барча мамлакатларда 2040 йилгача кўмирдан фойдаланишни босқичма-босқич тўхтатишни ўз ичига олади. Бош котибнинг сўзларига кўра, пакт барча учун универсал, арзон ва барқарор энергияни таъминлайди. Ундаги ривожланган ва ривожланаётган иқтисодиётлар умумий стратегия атрофида бирлашади.
Бош котибга кўра, икки йирик иқтисодиёт – Қўшма Штатлар ва Хитойга ушбу пактни амалда қўллаш бўйича саъй-ҳаракатларни бирлаштириш учун алоҳида масъулият юклайди.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
