Германия социал-демократларининг сўзларига кўра, Илон Маск ижтимоий тармоқни сотиб олганидан сўнг уни янада сиёсийлаштириши хавфи мавжуд.
Улар Илон Маскнинг Twitter ижтимоий тармоғини сотиб олиши сўз эркинлигига салбий таъсир кўрсатиши мумкин, деб ҳисоблайди ва ушбу платформа устидан назоратни кучайтиришни таклиф қилди.
«Twitter энди бу тармоқни янада сиёсийлаштирмоқчи бўлган одамга ўтаётганини мен жиддий муаммо деб биламан», деди ГСДП ҳамраиси Ларс Клингбайль. Унинг фикрича, «плюрализмга кейинги ҳужумлар» содир бўлган тақдирда «доимий чоралар» кўрилиши керак.
Ўз навбатида, ГСДПдан депутат Йенс Зиммерман вазиятнинг ҳозирги ривожланишини «ўта танқидий» деб атади. Унинг сўзларига кўра, ходимларнинг ярмига қисқаришини ҳисобга олсак, Twitter контентни модерация қилиш ва шикоятларни кўриб чиқиш бўйича Европа қонунчилиги талабларига риоя эта олмайди.
«Федерал адлия департаменти Twitterни қаттиқроқ назоратга олиши ва қоидабузарлик ҳолатларида тез ва қатъий ҳаракат қилиши керак», деди Зиммерман.
У Германия Aдлия вазири Марко Бушмандан «ҳал қилувчи чора» кутишини қўшимча қилди. Германия Федерал Aдлия идораси ижтимоий тармоқлардаги муаммоли контент ҳақидаги шикоятлар учун жавобгардир ва агар керак бўлса, платформа операторларини жаримага тортиши мумкин. ГСДП вакилининг сўзларига кўра, талаблар бажарилмаган тақдирда жарималар нафақат юридик шахс сифатида Twitterда, балки ушбу иш йўналишлари учун масъул бўлган якка тартибдаги менежерларга ҳам қўлланилиши мумкин.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
