Эквадор президентлигига номзод, мамлакат Миллий ассамблеяси аъзоси Фернандо Вильявисенсио чоршанба куни мамлакат пойтахти Китода бўлиб ўтган сайловолди йиғилишидан сўнг ўлдирилди.
BBC‘нинг ёзишича, унинг сайловолди ташвиқотларини олиб борувчи гуруҳи аъзоси маҳаллий ОАВга Вильявисенсио машинага ўтираётганида бир киши олдинга чиқиб, унинг бошига ўқ узганини айтган. Унинг ўлимини амалдаги президент Гильермо Лассо ижтимоий тармоқларда тасдиқлаган.
Гувоҳларнинг сўзларига кўра, гумонланувчи Вильявисенсиога уч марта ўқ узган ва воқеа жойидан қочишга муваффақ бўлган.
Эквадорда гиёҳвандлик картелларининг кўпайиши туфайли зўравонлик жиноятларининг ўсиши президентлик кампаниясининг асосий муаммоси бўлган.
Ўтган ой Лассо уюшган жиноятчилик билан боғлиқ бир қатор қотилликлардан сўнг учта вилоятда фавқулодда ҳолат ва тунги комендантлик соати эълон қилган.
Хавфсизликдан ташқари, Вильявисенсио кампанияси коррупцияга қарши курашга қаратилган. Ўтган ҳафтада у ва унинг жамоаси гиёҳванд моддалар савдоси билан боғлиқ бўлган жиноий гуруҳ раҳбари томонидан таҳдид қилинганини айтган.
Унинг ўлдирилиши июлда Манта шаҳри мэри Агустин Интриаго ва февралда Пуэрто-Лопес шаҳри мэри лавозимига номзод Омар Менендеснинг ўлдирилишидан кейин содир бўлган.
Полиция Эквадор президентлигига номзод Фернандо Вильявисенсиони ўлдиришда гумон қилиб, икки кишини ҳибсга олди. Бу ҳақда чоршанба куни Ecuavisa телеканали хабар берган. Унинг сўзларига кўра, сиёсатчини отганлар учта бўлган. Полиция учинчи шахсни қидиришда давом этяпти.
Президентлик сайловининг биринчи босқичи 20 августга белгиланган.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
