Евгений Пригожин 23 август куни самолёт қулаши ортидан ҳалок бўлди. Орадан мана бир неча кун ўтсада, у раҳбарлик қилган «Вагнер»нинг тақдири ноаниқлигича қолмоқда. New York Times’га кўра, ичкарида рақобат кучли. Пригожин империя шу кунларда талаш бўлмоқда.
Энг катта савол эса – унинг Россиядан ташқаридаги бизнеси. Биласиз, узоқ йиллар давомида Вагнерчилар Африкада операцияларга бош бўлишди. Бу қитъада йиғилган бойликнинг тақдири – бугуннинг энг катта саволига айланган.
Албатта, агарда Путин Пригожинни йўқ қилишга буйруқ берган бўлса, бу бизнесларнинг ҳам келажагини, аллақачон ҳал қилиб бўлган. Лекин, ҳозирча кимга нима тегишини билмаймиз. New York Times ёзишича, бугун нафақат Африкада балки, Пригожиннинг «имкониятлари» уч қитъада талаш бўлмоқда.
Россия билан иттифоқдош бўлган африка давлатлари етакчилари жиноятчи Пригожиннинг бу операцияларига ўрганиб қолган эди. Олтин ва олмослар эвазига қурол-яроғ алмашилгани ҳам айтилади.
New York Times ўз мақоласида Пригожинни қўпол ва бемаъни жиноятчи, деб атаган.
Ўтган ҳафта Африканинг учта давлатида бўлган Россия делегациясига мудофаа вазири ўринбосари Юнус-бек Евкуров бошчилик қилди. Бу шубҳали. Бундай шароитда Африкага ким бориши жуда муҳим.
«Биз сизга ёрдам бериш учун қўлимиздан келганини қиламиз», деди у Буркина-Фасодаги матбуот анжуманида.
Яъни, «Вагнер» энди ёки бутунлай йўқ қилинади, яъни аскарлар тарқатиб юборилади. Яна бир вариант эса мудофаа вазирлигига бўйсуниш. Вазирлик эса Путинга бўйсунади. Демак, жиноятчилардан иборат гуруҳ бевосита давлат раҳбарига бўйсунадими? Таҳлиллар шуни тасдиқламоқда.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
