Украина: Россияга қарши урушга ит ва мушуклар ҳам ташланди

У ва яна бир қанча бошқа жониворлар – айримлари ҳақиқий, айримлари мультфильм – ўз ижтимоий медиа аккаунтлари орқали руҳан қўллаб-қувватлаш ва амалий маслаҳатлар бермоқда.

Улар уруш сабабли келиб чиққан мураккаб ҳисларни қандай жиловлашдан тортиб, портловчи қурилмани кўрганда нима қилишгача бўлган йўл-йўриқларни қамраб олади.

Ўз меҳнати самараси ўлароқ, Патрон Киевга ташриф буюрган кўплаб машҳур ва нуфузли шахслар билан учрашмоқда. Улар орасида «Узуклар ҳукмдори» юлдузи Орландо Блум, Британия Бош вазири Риши Сунак ва Канада Бош вазири Жастин Трюдо ҳам бор.

Украина почта хизмати бу итнинг суратини маркаларида чоп қилди, Президент Зеленский эса уни «Содиқ хизматлари учун» тақдирлади.

Патроннинг эгаси Михайло Ильевнинг айтишича, итнинг хорижий муҳим шахслар билан учрашуви фавқулодда хизматларга мина тозалаш ишлари учун керакли ускуналар келтирилишига ёрдам бермоқда.

Жэк Расселл терьер урушдан азият чеккан одамлар учун, айниқса, мина тозалашда жароҳат олган ҳамкасблари учун хайрия маблағи тўплашга ҳам жалб қилинган. У бошқа жониворлар учун хайрия тадбирларида ҳам қатнашяпти.

«Бизнинг кичик дўстларимиз ташлаб кетилган ёки жароҳатлангандан сўнг оғир кунларни бошдан кечиради. Улар ҳам яшашни исташини, уларга ҳам ёрдам кераклигини биламиз», дейди Ильев Би-би-сига.

Патроннинг Instagram’даги аккаунтида нафақат бу жозибали итнинг суратлари жойланган, балки у уруш даҳшатлари қаршисида қолган украиналикларга умид, илҳом ва маслаҳатлар бермоқда.

«Умид ўлмаслиги керак. Уруш тезда ниҳоясига етишига умид қиламиз. Ғалаба яқинлигига умид қиламиз. Одамлар бошқа ўлдирилмаслигига умид қиламиз. Баъзида биздаги ягона нарса умид бўлади», деб ёзилган унинг постларидан бирида.

«Умидни йўқотма. Ўтинаман. Ҳозир эса, кел сени умидли ялаб қўяй!»

Патрон, шунингдек, портламай қолган қуроллар ҳақида болалар учун ҳикоя қилувчи мультфильм қаҳрамони ҳамдир.

«Машҳурлигига қарамай, Патрон кундалик мина исковичлик ишини давом эттирмоқда», дейди Ильев.

Хайрия маблағи тўпловчи мушук

Мушук Степан Россия снарядларидан қаттиқ жабр кўрган Харьковнинг иккинчи йирик шаҳри Сальтовкадан.

Урушдан олдин Степан интернетдаги яна бир ажойиб ақлли мушук эди. Аммо Россиянинг кенг миқёсли босқинидан кейин унинг Instagram аккаунтида нафақат фотосуратлар жойланди, балки уруш ҳақида фикр билдира бошланди.

Илгари у рус тилида ёзарди, уруш бошлангач, украин тилига ўтди. Россия босқинидан кейин Украина бўйлаб кўп одамлар худди шундай қилишди.

Степаннинг эгаси Анна Би-би-сига Россиянинг гўёки русийзабон аҳолини қўллаб-қувватлаш учун чет элга интервенциясини оқлаш учун айтилаётган баҳонага ишора қилиб, «Бу «рус дунёси» аслида нима эканлигини кўргач, барчамиз руҳан ўзгардик», дейди.

«Украин тили менинг, мамлакатим ва халқим ҳаётининг бир қисмидир», дейди у.

Instagram’да 1,3 миллион обуначига эга бўлган Степаннинг аккаунти ўз машҳурлигидан урушда жабрланган ҳайвонларга ёрдам бериш учун фойдаланмоқда. Ўтган йили у озиқ-овқат, дори-дармон ва бошқа парваришлар учун 15 000 еврога яқин маблағ йиғишга ёрдам берди.

Июнь ойида Украина жанубидаги Каховка тўғони вайрон бўлгач, Степан сув босган ҳудудлардан ҳайвонларни эвакуация қилиш учун маблағ тўплашга ёрдам берди.

У, шунингдек, Харьковда ўққа тутилган кутубхонани таъмирлаш учун ёрдамда иштирок этган.

Лекин гап фақат Степаннинг аккаунти тўплайдиган пулда эмас.

«У одамларга, айниқса, болаларга уруш даҳшатларини қисқа вақтга бўлса ҳам унутишлари учун ёрдам беради. Шунинг учун унинг постларида ҳазиллар бор», дейди Анна.

Степан ўз постларида уруш реаллигига ҳам тўхталади, масалан: «Оҳ, мен ўз мамлакатим тезроқ ғалаба қозонишини истайман! Фронтдаги одамлар жонини фидо қилаётган тинчликка эришишини, одамлар ва ҳайвонлар ўлмаслиги учун ракеталар йўқ бўлишини истайман».

Мультфильм мушук

Одамлар агар маслаҳат мўйнали уй ҳайвонидан келганга ўхшаса, уни кўпроқ қабул қилади, дейди «Мушук Инжир» номли мультфильм қаҳрамонини яратган Олена Павлова.

«Мушукнинг сурати сўзлардан кўра кўпроқ жойга боради. Мен уни кўп марта кўрганман, – дейди у менга. – Мушук расмлари ва мемлар кўплаб муҳим хабарларни етказишга ёрдам беради. Уларни тушуниш осонроқ. Мушуклар суратлари бизга ёрдам беради.»

«Мушук Инжир табиий антидепрессант ҳисобланади. Мен уни ўзим ва ўқувчиларим кайфиятини яхшилаш учун яратдим. У позитив, меҳрибон ва ёқимтой, одамларга умид ва ёруғлик топишга ёрдам беради», дейди Павлова хоним.

Инжирнинг ижтимоий тармоқлардаги аккаунтлари украиналикларни кўпроқ китоб ўқишга ундайди, қандай хайрия маблағи тўплаш, толиқмаслик ва нима учун ҳамма мушукдек бўлиши кераклиги каби мавзуларда маслаҳатлар беради.

«Мушуклар чарчамайди, ўз мақсадларига эришишда саботли бўлади», дейилади унинг постларидан бири.

Улар урушдами ёки йўқ, ҳамма учун фойдали маслаҳатлар.