Европа Иттифоқи Россия Федерациясига нисбатан 2,5 миллиард евролик импорт ва тахминан 5,3 миллиард долларлик экспортга қаратилган 12-чекловчи чоралар пакетини ишлаб чиқмоқда. Бу ҳақда Bloomberg ўз манбаларига таяниб хабар бермоқда.
Нашр манбаларининг аниқлик киритишича, ЕИ учинчи давлатлар орқали санкцияларни четлаб ўтиш имкониятини ёпиш ва Кремлни даромаддан маҳрум этишни мақсад қилган. Янги санкциялар Россиянинг пайвандлаш ускуналари, кимёвий моддалар ва юқори технологияли ҳарбий товарлар экспортига таъсир қилади. Шунингдек, металл, қурилиш материаллари, транспорт воситалари ва олмос импортини чеклаш режалаштирилган.
Манба таъкидлаганидек, ЕИ учинчи давлатлар орқали Россия Федерациясига қурол компонентларини етказиб бериш каналларини ёпишга ҳаракат қилмоқда. Санкцияларни четлаб ўтишга ёрдам берадиган компанияларга нисбатан таъсир чоралари кучайтирилади. Суҳбатга олинган экспертларнинг қайд этишича, Европа Иттифоқи ҳам Россия нефтининг баррелига белгиланган максимал 60 доллардан юқори савдоси муносабати билан Россия Федерациясига қарши нефт эмбаргоси устидан назоратни кучайтириш ниятида.
Манбаларга кўра, пакет Европа Иттифоқи қора рўйхатини 100 дан ортиқ россиялик шахслар ва 40 га яқин ташкилотларга кенгайтиради.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
