Украина президенти Владимир Зеленский Associated Press агентлигига берган интервюсида Россия билан уруш янги босқичга ўтганини айтди ва Украинанинг қарши ҳужуми натижаларини баҳолади.
“Биз урушнинг янги босқичида турибмиз ва бу ҳақиқат. Қишнинг ўзи урушнинг янги босқичидир”, деди Зеленский Харковга сафари чоғида.
Украина шаҳарларининг энергетика инфратузилмасига Россиянинг кенг кўламли ҳужумлари хавфи яна пайдо бўлди. Зеленскийнинг сўзларига кўра, қишда жанглар нафақат фронтда, балки шаҳарлар ичида ҳам бўлади.
Айни пайтда ўқ-дорилар захираси камайиб бормоқда, бу эса Украина ҳарбийларининг ҳарбий амалиётларини фалаж қилиши мумкин.
“Биз тезроқ натижаларга эришмоқчи эдик. Шу нуқтаи назардан қараганда, афсуски, биз хоҳлаган нарсага эриша олмадик. Ва бу ҳақиқат”, – деди Зеленский.
Унинг сўзларига кўра, Украина ўз иттифоқчиларидан ўзи учун зарур бўлган барча қуролларни олмаган, қуролли кучларнинг чекланганлиги ҳам тезкор ҳужумнинг олдини олган.
“Исталган натижаларга тезроқ эришиш учун куч етарли эмас. Аммо бу таслим бўлишимиз керак дегани эмас”, — деди Зеленский.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
