Efiopiya 33 million dollarlik xalqaro davlat obligatsiyalarini to‘lamagani uchun defoltga uchradi. Reuters xabariga ko‘ra, bu mamlakat so‘nggi yillarda kredit majburiyatlarini bajara olmagan uchinchi Afrika davlatiga aylandi, deb xabar berdi Africanews.
Afrikaning aholisi eng ko‘p bo‘lgan ikkinchi mamlakati dekabr oyining boshida rasman defolt e’lon qilmoqchi ekanini ma’lum qilgan, chunki u COVID-19 pandemiyasi va 2022 yil noyabr oyida tugagan ikki yillik fuqarolar urushidan keyin og‘ir moliyaviy ahvolga tushib qolgan. Mamlakat to‘lovni 11 dekabrda yopishi kerak edi, ammo texnik jihatdan bu muddat 1 milliard dollarlik obligatsiyaga yozilgan 14 kunlik «imtiyozli davr» bandi tufayli 26 dekabrda tugadi.
Efiopiya hukumati 8 dekabr kuni o‘z obligatsiyalariga ega bo‘lgan pensiya jamg‘armalari va boshqa xususiy sektor kreditorlari bilan muzokaralar olib borayotganini, biroq natija yo‘qligini aytdi. S&P Global kredit reyting agentligi 15 dekabr kuni obligatsiyalarni defolt darajasiga tushirib, kupon to‘lovi amalga oshirilmasligini ko‘rsatdi.
Ilgari boshqa rivojlanayotgan mamlakatlar ham xuddi shunday muammoga duch kelishgan. S&P Global Ratings hukumat qarzni to‘lashni to‘xtatganidan so‘ng Ganani 2022 yil uchun defolt deb e’lon qildi. Zambiya 2020 yilda 12 milliard dollar qarz bilan defoltga uchradi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
