Professional boksning WBA yoʻnalishi boʻyicha jahon chempioni Isroil Madrimov bugun Toshkentga qaytib keldi.
MOQ Bosh kotibi Oybek Kasimov sportchimizni Olimpiya oilasi nomidan qutlab, chempionga Oʻzbekiston Respublikasi Prezidenti sovgʻasi – “Tahoe” avtomobilining kalitini topshirdi. Madrimov davlat tomonidan koʻrsatilayotgan eʼtibordan mamnun ekanini taʼkidlab, kelgusida qolgan yoʻnalishlardagi chempionlik kamarlarini ham Toshkentga olib kelishini aytdi.
Isroil Madrimov 8-mart kuni Saudiya Arabistonida oʻtgan chempionlik bellashuvida faoliyatida 25 ta jang oʻtkazib, ularning barchasida gʻalaba qozongan rossiyalik Magomed Kurbanovni 5-raundda nokautga uchratgan edi.
Shu tariqa, Isroil Madrimov super oʻrta vazn toifasida jahon chempionligini qoʻlga kiritgan oʻzbekistonlik birinchi bokschiga aylandi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!