Yangi tadqiqotlar shuni ko‘rsatmoqdaki, elektron sigaretalarni chekkan odamlarda yurak yetishmovchiligiga chalinish ehtimoli 19 foizga ko‘pdir.
Eslatib o‘tamiz, yaqinda O‘zbekiston SSV tomonidan bir qator tamaki va nikotin mahsulotlari, elektron sigaretalar va tamaki isitish tizimlarining muomalasiga taqiq joriy etishni nazarda tutuvchi qonun loyihasi eʼlon qilingan edi.
SSV tomonidan ishlab chiqilgan qonun loyihasiga ko‘ra, O‘zbekistonda elektron sigaretalar va tamakini qizdirish tizimlarini (IQOS) muomalasini taqiqlash ko‘zda tutilmoqda. Shuningdek, ushbu mahsulotlar muomalasini taqiqlash bilan bog‘liq huquqbuzarliklar uchun javobgarlik belgilanmoqda.
Hujjatda aytilishicha, maktablarning yuqori sinf o‘quvchilari orasida elektron sigaretalarga qiziqish tez surʼatlarda ortmoqda, xususan, 26,6 ming o‘g‘il bolalar va 8,6 ming qiz bolalar chekishga moyil.
Maktab va jamoat joylarida o‘tkazilgan reydlarda o‘quvchilardan olingan elektron sigaretalar soni yildan-yilga tobora oshib bormoqda. 2019-yilda 6 ta holat, 2020-yilda – 27 ta, 2021-yilda – 31 ta, 2022-yilda – 856 ta, 2023-yilda – 1040 ta aniqlangan.
«Agar zarur choralar ko‘rilmasa, kelgusida yosh avlodning har beshinchisi (20 foiz) nikotinga qaramlikdan aziyat chekadi», deyiladi manbada.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
