Rossiyada joriy yilning dastlabki uch oyida 145 mingta nikoh va 160 mingta ajralish qayd etildi. Mutaxassislarning ta’kidlashicha, ajralishlarga moddiy muammolar emas, koʻproq er-xotin oʻrtasida ruhiy rishtalarning zaifligi, bir-biriga moslashish va muzokara oʻtkazish qobiliyatining yoʻqligi sabab boʻlmoqda. Shuningdek, 30 yoshgacha turmush qurganlar orasida ajrashish kamligi kuzatilmoqda.
Rosstat ma’lumotlariga koʻra, joriy yilning yanvar-mart oylarida Rossiyada 145 mingta nikoh va 160 mingta ajralish qayd etilgan. Rossiya nikoh instituti inqirozini boshdan kechirmoqda. Mamlakatda e’lon qilingan “Oila yili”da ajralishlar soni nikohlar sonidan 3 foizga oshdi, ya’ni bugungi kunda har 100 nikohga 103 ta ajralish toʻgʻri kelmoqda, deb yozdi “Nakanune” nashri.
Mutaxassislarning fikricha, ajrashishlar sababi faqatgina moliyaviy muammolarda emas. Ajralishlar sonining koʻpayishida er va xotin oʻrtasida ruhiy rishtalarning yoʻqligi, oilaning har bir a’zosidagi psixologik muammolar va kelishib keta olmaslik kabilar moddiy muammolardan kam rol oʻynamayapti.
Psixolog Anna Zakaidzening ta’kidlashicha, bugungi kunda odamlar bir-birining kamchiliklariga chidashga tayyor emaslar. Chunki ularning aksariyati 30 yoshdan keyin turmush qurishadi. Bu davrda har kim oʻz shaxsiy odatlarini allaqachon shakllantirgan boʻlib, ruhiyati moslashuvchanlikni qabul qilmaydi, kelishib, tinch-totuv yashash uchun muhim hisoblangan muzokara olib borish, kelishib ketish kabilarga toqatsiz boʻladi. Mutaxassis keltirgan statistik ma’umotlarga koʻra, 30 yoshgacha turmush qurganlarda keyinroq ajrashish ehtimoli pastroq boʻladi.
“Nima uchun ajralishlar sodir boʻladi? Statistik ma’lumotlar oʻzgarmoqda, masalaning moliyaviy tomoni aslida birinchi oʻrinda emas, birinchi navbatda tushunmovchilik, odamlar bir-birini eshita olmaydi. Har bir inson psixologik bilimga ega boʻlishi kerak, yangi turmush qurganlar oila qurishdan oldin oʻtadigan kurslar boʻlishi kerak”, – deydi psixolog. Toʻlov va imtiyozlar koʻrinishidagi davlat yordamining salbiy tomoni, ekspertning fikricha, odamlar nafaqa olish uchun turmush qurishadi. Bu nimaga olib keladi? “Hozir bizda 20-25 yil birga yashaganlar orasida ajralishlar koʻp. Bolalar ulgʻaygach, ularni boshqa hech narsa ushlab turmaydi”.
“Statistik ma’umotlarga koʻra, oilalarning 35 foizi bolalar tufayli ajralishmaydi. Bu nikohni ushlab turadigan narsa. Bolalar uyadan uchib chiqqach, sheriklar endi ularni hech narsa bogʻlamasligini tushunib etishadi”, – deydi ekspert.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
