Bugun Prezident Shavkat Mirziyoyev Turkiya Respublikasi tashqi ishlar vaziri Hakan Fidan, ichki ishlar vaziri Ali Yerlikaya va Milliy razvedka xizmati direktori Ibrohim Qalindan iborat delegasiya bilan uchrashuv o‘tkazadi.
Turkiya delegasiyasi O‘zbekiston Prezidentining joriy yil 6-7 iyun kunlari ushbu mamlakatga amalga oshirgan rasmiy tashrifi davomida erishilgan kelishuvlarga muvofiq Toshkentga tashrif buyurdi.
Mamlakatlarimiz yetakchilarining qarorlarini amalga oshirish, xavfsizlik uchun zamonaviy tahdid va xatarlarga qarshi kurashda o‘zaro muvofiqlashuv va amaliy hamkorlikni kuchaytirish masalalari diqqat markazida bo‘ladi.
Ta’kidlash joizki, bunday formatdagi uchrashuvlar ilk bor o‘tkazilmoqda hamda O‘zbekiston-Turkiya keng qamrovli strategik sheriklik munosabatlarining ustuvor yo‘nalishlarida tizimli hamkorlikni yo‘lga qo‘yishga qaratilgan.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
