Yuqori tezlikda harakatlanuvchi «Afrosiyob» 2023-yilda 238 milliard so‘m zarar ko‘rgan. Bu haqda «O‘zbekiston temiryo‘llari» AJ boshqaruv raisi Zufar Narzullayev Senatning ellik sakkizinchi yalpi majlisda ma’lum qildi.
Zufar Narzullayevning so‘zlariga ko‘ra, «Afrosiyob» biror yil foyda bilan ishlamagan. «Yevropada, umuman, jahon miqyosida tezyurar poyezdlarning chipta narxi samolyot narxidan qimmat yuradi. Oddiy poyezdlarning chipta narxi ma’lum bir belgilangan tarif asosida ushlab turiladi», deydi u.
«O‘zbekiston temiryo‘llari» AJ boshqaruv raisining aytishicha, 2025-yil 1-yanvardan boshlab yuqori tezlikda yuradigan poyezdlarning chipta narxi xuddi samolyotlarniki kabi o‘zgarib turadi. «Bunda poyezd chiptasi narxi talabga qarab, xuddi samolyot chiptasi narxlari kabi o‘zgarib turadigan bo‘ladi. Qolgan oddiy poyezdlarning chipta narxlari Iqtisodiyot va moliya vazirligi bilan kelishilgan holda tartibga solinadi», deydi «O‘zbekiston temiryo‘llari» rahbari.
Eslatib o‘tamiz, 2024-yil 20-yanvardan boshlab yuqori tezlikda harakatlanuvchi «Afrosiyob» elektropoyezdlari hamda «Sharq», «Nasaf» va «O‘zbekiston» tezyurar poyezdlarining chiptalar narxi 20 foizga oshgan edi. 15-maydan boshlab esa «Afrosiyob» elektropoyezdi chiptalari narxi ekonom klass uchun 20 foizga, biznes klass uchun 30 foizga, VIP klass uchun 40 foizga oshirilgandi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
