O‘zbekistonning eng muhim magistrallaridan biri bo‘lgan M39 xalqaro yo‘li – poytaxtni vohalar bilan bog‘lovchi yagona yo‘l hisoblanadi. Ammo bu yo‘lda yuzaga kelayotgan muammolar va mas’ul tashkilotlarning e’tiborsizligi yo‘lovchilarning haqli noroziligiga sabab bo‘lmoqda.
Yo‘lni bosib o‘tish haqida gap ketganda, asosiy muammo – sifatsiz qurilish va notekis yo‘llardir. Chuqurlar, yomon asfaltlash, doimiy ta’mirlanish ishlari tufayli haydovchilar va yo‘lovchilar uchun bu yo‘l sinov maydonchasiga aylanib qoldi. M39 yo‘li xalqaro maqomga ega bo‘lsa-da, uning holati ushbu maqomga mutlaqo mos emas.
Bunga qo‘shimcha ravishda, Sirdaryo ustidan o‘tuvchi ko‘prik uch oydan buyon ta’mirda. Ko‘prikning yopilishi qatnovni yanada murakkablashtirgan, odamlar esa har kuni vaqt va asab sarflab, muqobil yo‘llarni izlashga majbur. Bu vaziyat nafaqat yo‘lovchilarning, balki barcha foydalanuvchilarning hayotini qiyinlashtirmoqda.
Asosiy savol tug‘iladi: Bu yo‘l va uning ta’mir ishlari uchun javobgar tashkilotlar bormi? Har kuni yo‘llar uchun to‘lanayotgan soliqlar qayerga ketayotgani haqida hech kim hisobot bermaydi. Ko‘rinishicha, yo‘llar uchun mas’ul tashkilotlar yo‘lovchilarning qulayligi va xavfsizligini ta’minlash o‘rniga faqat vaqtinchalik yechimlar bilan shug‘ullanmoqda.
Yo‘llarning ahamiyati shunchaki qatnov uchun emas, ular xalq uchun qulay va xavfsiz bo‘lishi lozim. Ammo bugungi holat shuni ko‘rsatmoqdaki, yo‘l uchun javobgar bo‘lgan tizimlar o‘z ishiga loqayd qaramoqda. Agar vaziyat o‘zgarmasa, bu nafaqat yo‘llar, balki butun transport infratuzilmasiga bo‘lgan ishonchni yo‘qotishga olib kelishi mumkin.
Asqar ISMOILOV,
Jamoat faoli
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
