Ijtimoiy tarmoqlarda O‘zbekiston aholisi orasida uylari va xonadonlarini ta’mirlayotgan qurilish brigadalari, santexniklar va elektrchilar haqida shikoyatlar tinmayapti, deb yozmoqda Vaib.uz blogi. Odamlar sifatli xizmatlar uchun, hatto katta summalarni ham to‘lashga tayyor, ammo ko‘pincha bir xil muammolarga duch kelishmoqda. Bu esa ta’mirlash yoki texnik xizmatni haqiqiy tushkunlikka aylantiradi.
Bir xil ssenariy
Hamma narsa ijobiy kutishlardan boshlanadi: ustalar keladi, o‘z malakasi haqida ishonch bilan gapiradi, qisqa muddatlarda sifatli ishni va’da qiladi. Shundan so‘ng, ular avans – odatda umumiy summaning 30-50 foiz miqdorida pulni oladi, keyin esa muammolar boshlanadi:
Muddatlarni buzish – brigada bir necha kunga yo‘qoladi yoki kechikib keladi, ba’zida esa umuman sababsiz yo‘q bo‘lib qoladi.
Past samaradorlik – ishlar cho‘zilib ketadi, xodimlar ish vaqtini qisqartirib yoki sust ishlashadi.
Doimiy bahonalar – goh kerakli asbob yo‘q, goh “material sotib olish” kerakligi, goh boshqa obyektda band ekanliklari haqida aytishadi.
Buyurtmachiga stress – mijozlar ustalarga qayta-qayta qo‘ng‘iroq qilish, eslatish va ishni yakunlashga undashga majbur bo‘lishadi.
Natijada esa – asablar buziladi, muddatlar cho‘ziladi va qo‘shimcha xarajatlar yuzaga keladi.
Nega avans to‘lovidan qochib bo‘lmaydi?
Asosiy muammo shundaki, avanssiz hech kim ishlashga rozi bo‘lmaydi. Ishonch masalasi juda dolzarb: pudratchilar nohalol mijozlardan, mijozlar esa nohalol ustalardan qo‘rqishadi.
Rasmiy shartnoma tuzishga yoki qurilish kompaniyasiga murojaat qilishga urinish mumkin, lekin amaliyot shuni ko‘rsatadiki, bu ham har doim ish sifati va muddatlari kafolatini bermaydi. Kompaniyalar ham ishlarni cho‘zish, majburiyatlarni bajarmaslik va ish jarayonida qo‘shimcha xarajatlar talab qilish bilan shug‘ullanishadi.
Aldanmaslik uchun nima qilish kerak?
1. Tavsiya bo‘yicha mutaxassislarni tanlang. Do‘stlar va tanishlarning shaxsiy tajribasi – eng ishonchli manba.
2. Ish muddatlari va bosqichlarini aniq belgilangan shartnoma tuzing. Shartlar qanchalik batafsil yozilgan bo‘lsa, nohalol ijrochilarning javobgarchilikdan qochishi shunchalik qiyin bo‘ladi.
3. To‘lovlarni bosqichma-bosqich amalga oshiring. Yirik avans o‘rniga ishning alohida bosqichlari uchun kichik miqdorda pul to‘lashni kelishib oling.
4. Jarayonni shaxsan nazorat qiling. Ishning borishini qanchalik tez-tez tekshirsangiz, ustalarning beparvolik qilish ehtimoli shunchalik kam bo‘ladi.
5. Ijtimoiy tarmoqlar va onlayn platformalardan foydalaning. Hozirda ko‘plab ustalar maxsus saytlarda o‘z obro‘sini saqlashga harakat qilib, mijozlar fikr-mulohazalarini hisobga olishadi.
Asab buzilishlarisiz ta’mirlash mumkinmi?
Afsuski, O‘zbekiston qurilish bozori mijoz ish sifati va muddatlariga ishonch hosil qilishi uchun yetarli darajaga yetmagan. Shu sababdan, ustalarni tanlashda maksimal darajada ehtiyotkor va farosatli bo‘lish, ta’mirlash yoki xizmat ko‘rsatishning barcha bosqichlarini nazorat qilish yagona yechim hisoblanadi. Ammo bu ham afsuski, yaxshi natijani kafolatlamaydi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
