Vazirlar Mahkamasi 26-fevral kuni elektron to‘lov tizimlaridan foydalanishni kengaytirish bo‘yicha qo‘shimcha chora-tadbirlar to‘g‘risida qaror qabul qildi. Bu haqda Strategik islohotlar agentligi xabar berdi.
Hujjat prezidentning o‘tgan yil 4-martdagi farmoni bilan tasdiqlangan 2024-yilda islohotlarni amalga oshirish bo‘yicha chora-tadbirlar rejasining 59-bandi ijrosini ta’minlash maqsadida qabul qilingan.
Unda budjet tashkilotlari, gaz va neft mahsulotlari savdosi bilan shug‘ullanuvchi kompaniyalar, shuningdek, mol-mulkni ijaraga beruvchi qurilish korxonalari tomonidan jismoniy shaxslarga sotiladigan ko‘chmas mulk uchun hisob-kitoblar elektron hisobvaraq-faktura asosida naqd pulsiz amalga oshirilishi nazarda tutilgan edi.
Yangi qarorga ko‘ra, 2025-yil 1-iyuldan boshlab aholiga xizmat ko‘rsatuvchi barcha budjet tashkilotlari, shuningdek, gaz va neft mahsulotlarini realizatsiya qiluvchi hamda mol-mulkini ijaraga beruvchi yuridik shaxslar elektron to‘lov tizimlariga ulanishi shart.
Elektron to‘lovlarni qabul qilishni rad etish terminallar orqali to‘lovni rad etishga tenglashtiriladi va qonunchilikka muvofiq javobgarlikka sabab bo‘ladi.
2024-yilning fevral oyida prezident Shavkat Mirziyoyevga naqd puldan foydalanishni qisqartirish chora-tadbirlari bo‘yicha taqdimot o‘tkazilgan edi. Aholiga xizmat ko‘rsatuvchi budjet tashkilotlari, uy-joylarni jismoniy shaxslarga sotishda quruvchilar uchun naqd pulsiz hisob-kitoblarni joriy etish va boshqalar shular jumlasidandir. Yog‘och, avtomobil shinalari va shakarning ulgurji savdosini naqd pulsiz shaklga o‘tkazish rejalashtirilgan edi.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
