AQSh prezidenti Donald Tramp Rossiya Ukrainada o‘t ochishni to‘xtatishga rozi bo‘lishiga umid bildirdi. Uning so‘zlariga ko‘ra, agar Moskva bunga rozi bo‘lsa, AQSh tomonidan bosim choralari ko‘rishning hojati qolmaydi.
Vashingtonning vositachiligida Kiyev otashkesimga rozi bo‘lgach, amerikalik muzokarachilar maslahatlashuvlar o‘tkazish uchun Moskvaga yo‘l olgan edi. 12 mart kuni AQSh prezidenti Donald Tramp Irlandiya bosh vaziri Mixol Martin bilan uchrashuvda jurnalistlarga «hozirda ular allaqachon u yerda», deb ma’lum qildi.
Tramp Rossiya prezidenti Vladimir Putin otashkesimga rozi bo‘lishiga umid bildirdi. Shu bilan birga, agar muzokaralar samara bermasa, Vashington Moskva uchun og‘ir iqtisodiy oqibatlarga olib keladigan chora ko‘rishga tayyorligini ta’kidladi. «Men bunday yo‘l tutishni istamayman, chunki men tinchlikni xohlayman», — dedi AQSh prezidenti.
AQSh vitse-prezidenti Jyey Di Vensning so‘zlariga ko‘ra, Vashington va Moskva o‘rtasida faol muzokaralar davom etmoqda. «Biz hozir yaxshi pozitsiyadamiz. Ukraina o‘t ochishni to‘xtatishga rozi bo‘ldi, endi Rossiyani ham bunga ko‘ndira olamizmi yoki yo‘qmi, shuni ko‘ramiz», — dedi u.
Zelenskiy: Ukraina otashkesim taklifini qabul qildi
Ukraina AQSh tomonidan taklif qilingan 30 kunlik otashkesimga rozi bo‘ldi. Bu haqda Ukraina prezidenti Volodimir Zelenskiy 11 mart kuni kechki nutqida ma’lum qildi.
Zelenskiy Saudiya Arabistonida o‘tgan muzokaralar chog‘ida Kiyev «osmonda sukunat», «dengizda sukunat» va «asirlarni ozod qilish» tashabbuslarini ilgari surganini aytdi. Amerika tomoni esa birinchi qadam sifatida 30 kun davomida butun front bo‘ylab o‘t ochishni to‘xtatishni taklif qilgan.
«Ukraina bu tashabbusni qo‘llab-quvvatlaydi. Biz bunga tayyormiz. Endi AQSh Rossiyani bunga rozi bo‘lishga ishontirishi kerak. Agar Moskva rozi bo‘lsa, sukunat hukm suradi», — dedi Zelenskiy.
Endilikda butun e’tibor Rossiyaning bu taklifga qanday javob qaytarishiga qaratilgan.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
