Qashqadaryo viloyati, Chiroqchi tumanida yashovchi 31 yoshli erkak to‘y marosimida 14 qozon palov tayyorlab, amaldagi tartiblarni buzganlikda ayblandi. Sud uni 4,1 million so‘m jarimaga tortdi.
Ma’lum bo‘lishicha, to‘y marosimi 2024-yil oktabr oyida o‘tkazilgan. Erkakka nisbatan Ma’muriy javobgarlik to‘g‘risidagi kodeksning 192¹-moddasi (“To‘y va marosimlarni o‘tkazish tartibini buzish”) bo‘yicha ish qo‘zg‘atilgan.
Sud majlisida erkak o‘z aybini tan olib, quyidagicha izoh bergan:
“Hamma qarindoshlarni to‘ydirishni xohlagandim, oqibatini o‘ylamabman”, — degan u.
Sudda uning ishsizligi va ikkinchi guruh nogironligi inobatga olingan, ammo qonunchilik talablari asosida javobgarlikka tortilgan.
Sud qaroriga ko‘ra, unga 10 baravar bazaviy hisoblash miqdorida — 4,1 million so‘m jarima tayinlandi.
O‘zbekistonda to‘y va marosimlarni o‘tkazish tartibi 2020-yilda qabul qilingan hukumat qarori bilan belgilangan. Unga ko‘ra, mehmonlar soni, osh berish miqdori va xizmat ko‘rsatish shakllari qat’iy cheklangan.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
