Жанубий Корея Молия вазирлиги Ўзбекистон билан газ таъминоти бўйича 1 миллиард долларлик қарздорлик масаласини ҳал қилди, деб хабар берди «Yonhap» агентлиги.
Молия вазири Чу Кён Хонинг Ўзбекистон Республикасига ташрифи чоғида келишувга эришилди. Бироқ Жанубий Корея Молия вазирлиги раҳбари келишув тафсилотларини маълум қилмаган.
Тошкент ва Сеулда Сурғил конида газ ишлаб чиқарувчи «Uz-Kor Gas Chemical» қўшма корхонаси диққат марказида бўлди.
Argus Media порталининг ёзишича, “Ўзбекнефтгаз” шуъба корхонаси қўшма корхона томонидан ишлаб чиқарилган газ учун тўловни Америка валютасида амалга ошириши керак эди.
Бироқ валюта тақчиллигида қарзни тўлашда муаммолар юзага келди. Вазиятга ўзбек сўмининг қадрсизланиши ҳам салбий таъсир кўрсатди.
Uz-Kor Gas Chemical фойдасига дастлабки қарзлар 2017 йилдан ҳисобланган, бироқ олти йилдан сўнг томонлар 1 миллиард долларлик дебиторлик қарзларини тўлаш жадвалини келишиб олдилар, деб таъкидлади Argus Media.
Uz-Kor Gas Chemical компанияси 2008 йилнинг май ойида рўйхатга олинган. Корхоналар ва ташкилотларнинг ягона давлат реэстри маълумотларига кўра, устав капиталидаги улушнинг 50 фоизи “Kor-Uz-Chemical Investment”, 50 фоизи “Ўзбекнефтгаз” акциядорлик жамиятига тегишли.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
