Endi blogerlar ham soliq to‘laydi: Yangi qonun loyihasi nimalarni nazarda tutadi?
O‘zbekistonda 10 mingdan ortiq obunachiga ega blogerlar reklama orqali daromad oladigan bo‘lsa, endilikda soliqqa tortiladi. Bu haqda “Onlayn platforma va veb-saytlar foydalanuvchilarining huquqlarini himoya qilish to‘g‘risida”gi qonun loyihasida belgilab qo‘yilgan.
Qonun loyihasi jamoatchilik muhokamasi uchun e’lon qilingan bo‘lib, unda onlayn-platforma va veb-saytlar foydalanuvchilarining huquq va majburiyatlari aniq ko‘rsatib berilgan. Qonun davlat ro‘yxatidan o‘tgan ommaviy axborot vositalariga emas, aynan ijtimoiy tarmoqlarda faoliyat yuritayotgan shaxs va sahifalarga nisbatan tatbiq etiladi.
Kim bloger, kim inflyuyenser?
Qonun loyihasida bir nechta tushunchalarga aniqlik kiritilgan:
Bloger — ijtimoiy tarmoqdagi sahifasi orqali turli mavzularda kontent joylashtiruvchi shaxs.
Inflyuyenser — 10 mingdan ortiq obunachiga ega bo‘lgan bloger.
Veb-sayt egasi — kontent siyosatini belgilovchi jismoniy yoki yuridik shaxs.
Demak, 10 mingdan ortiq obunachisi bo‘lgan va reklama orqali daromad olayotgan har qanday bloger inflyuyenser hisoblanadi va qonuniy ravishda soliqqa tortiladi.
Blogerlar huquqlari qanday?
Qonun loyihasi bloger, inflyuyenser va sayt egalariga quyidagi huquqlarni kafolatlaydi:
Ijtimoiy tarmoqlarda akkaunt ochish;
O‘zbekiston qonunlariga zid bo‘lmagan kontent joylashtirish;
O‘z fikrini erkin ifoda etish;
Reklama va boshqa yo‘llar orqali daromad olish;
Platformadan foydalanish qoidalari haqida to‘liq axborot olish;
Huquq va manfaatlarini himoya qilish uchun sud yoki boshqa vakolatli organlarga murojaat qilish.
Majburiyatlar-chi?
Qonun loyihasi nafaqat huquqlar, balki bloger va inflyuyenserlar zimmasiga aniq majburiyatlarni ham yuklaydi. Jumladan:
O‘zbekiston qonunlariga rioya qilish;
Noqonuniy va yolg‘on kontentni tarqatmaslik;
Foydalanuvchi izohlarini nazorat qilish va noqonuniy sharhlarni o‘chirish;
Sha’niga putur yetkazilgan shaxslar iltimosiga ko‘ra raddiya e’lon qilish;
Tergov va sud materiallarini sud hukmisiz e’lon qilmaslik;
Daromad manbai bo‘lgan reklama faoliyati bo‘yicha soliqlarni o‘z vaqtida to‘lash.
Agar inflyuyenser o‘z aloqa ma’lumotlarini ochiq joylashtirmasa, unga reklama joylashtirish ham taqiqlanadi.
Nazorat qanday bo‘ladi?
Qonun loyihasida bir yil ichida uch martadan ortiq qonunga zid kontentni o‘z vaqtida o‘chirmagan blogerning faoliyati 6 oygacha to‘xtatilishi mumkin.
Bundan tashqari, O‘zbekiston qonunlariga rioya qilmaydigan yirik onlayn-platformalarga nisbatan kirish tezligini pasaytirish (bloklash emas, balki cheklash) chorasi qo‘llaniladi.
Xulosa: Bu kimga qanday ta’sir qiladi?
Qonun loyihasi inflyuyenserlar uchun yangicha tartibni belgilaydi. Bir tomondan ularning huquqlari mustahkamlanadi, ikkinchi tomondan esa javobgarlik kuchaytiriladi. Ayniqsa, reklama orqali daromad topayotgan blogerlar endi soliqqa tortiladi, va kontent uchun rasmiy javobgarlik ham oshadi.
Bu esa O‘zbekistonda internet makonida yanada tartibli, shaffof va qonuniy muhit shakllanishiga xizmat qilishi mumkin.
Sizda shikoyat, taklif yoki murojaat bormi? Bizga @demokratuz_aloqabot orqali murojaat qiling!
